Волстрит со претпазливост пред изборите во САД: пазарот сè уште не ја вградил можноста за „сино цунами

Акционерскиот пазар во САД сè уште не ја вградил во цените можноста демократите да го освојат и Претставничкиот дом и Сенатот, иако дел од анкетите и повеќето пазари за предвидување укажуваат кон тоа. Според вложувачите и аналитичарите, таквото сценарио би можело да ги притисне цените на акциите во средата, пренесува CNBC.

Доколку републиканците успеат да го задржат мнозинството во двата дома на Конгресот, тоа би можело да предизвика краткорочен раст на пазарот, велат тие. Надвор од краткорочните движења, вообичаената шема по меѓуизборите во следните месеци е позитивна за акциите. Сепак, дел од аналитичарите се прашуваат дали пазарот овојпат би можел да отстапи од позитивниот историски тренд, бидејќи индексот S&P 500 веќе забележал двоцифрен раст во 2026 година пред изборите.

Кога станува збор за поединечни акции, голема победа на демократите во вторник навечер — особено во трката за гувернер на Тексас — би можела дополнително да го поттикне распродавањето на акциите поврзани со вештачката интелигенција, поради очекувањето дека ограничувањата за центри за податоци би добиле на сила низ целата земја. Акциите на одбранбената индустрија, пак, би можеле да бидат под притисок поради стравувањата од ограничувања на трошењето.

Анкетите укажуваат на победа на демократите во Претставничкиот дом и на неизвесен резултат во Сенатот, додека пазарите за предвидување се поповолни за демократите и предвидуваат „сино цунами“. Тобин Маркус од Wolfe Research изјави за CNBC дека вложувачите покажуваат „воздржано прифаќање“ на основното сценарио за демократска победа, но дека не се позиционирани така. Според анкетата на фирмата меѓу повеќе од 100 институционални вложувачи, тие не се силно позиционирани за ниту еден конкретен резултат. Маркус додаде дека фирмата дели ставот оти „анкетите веројатно ја преценуваат силата на демократите“.

JPMorgan проценува дека „сино цунами“ би го намалило S&P 500 за околу половина процент во средата. Од друга страна, ако републиканците ги задржат двата дома на Конгресот, тоа би можело да поттикне раст, изјави Самир Самана од Wells Fargo Investment Institute, додавајќи дека „од аспект на сигурност, пазарот знае што да прави кога републиканците ги држат двата дома“. Стратезите на Citigroup оценија во понеделникот дека загубата на Претставничкиот дом од страна на републиканците, но задржувањето на Сенатот, би можело да биде „ветер во грб за акциите до крајот на годината“. Трговците на JPMorgan предвидуваат раст до 1 отсто во средата ако републиканците го задржат тој дом.

Инаку, историски гледано, S&P 500 бил повисок една година по сите меѓуизбори уште од почетокот на 1980-тите. Но, Џонатан Крински од BTIG забележува дека во годините на меѓуизбори индексот вообичаено бележел просечен пад од 14 отсто во некој момент во втората половина од годината. „Причината поради која акциите често имаат добри резултати во ноември за време на меѓуизборите е тоа што вообичаено е слаб пред изборите. Оваа година имаме спротивна поставеност“, напиша Крински минатата недела, додавајќи дека смета оти е поверојатно спротивното од консензусот за раст по изборите.

На пазарот не му помага ниту тоа што поширокиот пазар неодамна е под значителен притисок поради турбуленциите во тргувањето со вештачка интелигенција, што доведе Nasdaq Composite да го забележи најлошиот ден од јуни во петокот. Акциите поврзани со вештачка интелигенција повторно го повлекоа пазарот надолу во понеделникот. Роб Рејнс од Washington Analysis изјави за CNBC дека зголемената демократска контрола на државно ниво веројатно е неповолна за акциите поврзани со центри за податоци и технолошка капитална опрема, бидејќи „би ги зацврстила раните предупредувачки знаци во различни држави околу напредокот на инфраструктурата за вештачка интелигенција“. Стратезите на Goldman Sachs оваа недела оценија дека демократскиот Конгрес „би можел да ги ограничи даночните поттикнувања за центри за податоци, но национален мораториум изгледа малку веројатен при каков и да е изборен исход“.