Внимателно на патиштата низ Македонија: одрони, девијации и времен режим на неколку делници
Сообраќајот на државните патишта низ Македонија утрово се одвива непречено, главно по суви коловози, но Автомобилско-мотоциклистичкиот сојуз на Македонија (АМСМ) предупредува на внимателно возење на повеќе критични делници. Интензитетот на сообраќајот надвор од градските средини е умерен, додека на граничните премини од македонска страна нема подолги задржувања за влез и излез од државата, информираат од АМСМ.
Од АМСМ апелираат возачите да ја прилагодат брзината, да ја почитуваат поставената сигнализација и да бидат особено внимателни на патиштата низ котлини, речни долини и клисури, каде постои можност од појава на одрони. Особено внимание се препорачува на делниците Катланово – Велес, Маврово – Дебар – Струга, Виница – Берово и Кочани – Делчево.
Поради градежни и санациски активности, на повеќе делници низ земјава е воспоставен времен режим на сообраќај. На граничниот премин Делчево, поради реконструкција, од 9 септември е воведен времен режим. Од АМСМ информираат дека преминот ќе функционира непрекинато, а сообраќајот ќе се одвива нормално во текот на градежните работи.
На автопатот А4, на делницата Миладиновци – Свети Николе – Штип, кај наплатната станица Преод, до 1 октомври ќе има изменет режим поради санација на косина. Во Штип, од 6 јули трае времената измена на сообраќајот поради санација на мостот на реката Брегалница на патот Р1204.
На државниот пат А2, на делницата Гостивар – Стража, се изведуваат санации на мостовите, меѓу кои мостот број 4 – Вијадукт на Атанасова Река и мостот број 7 – Вијадукт на Дол. Поради работите е воспоставен времен режим на сообраќај. Времен режим има и на мостовите на А2 на реката Вардар кај село Желино, во двата правци – Скопје–Желино и Желино–Скопје.
На автопатот А1, на делницата Смоквица – Гевгелија, се изведуваат активности за поставување интерконективен гасовод под автопатот, поради што е поставена соодветна сигнализација за времен режим.
На државниот пат А2 – скопската обиколница, се врши рехабилитација на делница во должина од околу 250 метри, од клучката Волково до клучката Кондово. Поради работите затворена е левата сообраќајна лента за претекнување, а сообраќајот се одвива по средната лента и лентата за принудно запирање. Возачите се повикуваат да ја прилагодат брзината и да ја почитуваат поставената сигнализација.
Од АМСМ повторно апелираат до сите учесници во сообраќајот максимално внимателно да управуваат со возилата, да не превземаат ризични претекнувања и да ги почитуваат ограничувањата поставени поради изведување на работите. Ваквите временски режими, како што наведуваат, се неопходни за безбедно изведување на санациските и градежните активности, но и за заштита на самите возачи.