ВМРО-ДПМНЕ: Венко Филипче не треба да поднесе оставка, на СДСМ му одговара да губи со него на чело
Автор: Редакција на FinPortal.mk ·
ВМРО-ДПМНЕ порача дека Венко Филипче не треба да ја напушти функцијата претседател на СДСМ, иако, како што тврди партијата, социјалдемократите доживеале уште еден сериозен изборен неуспех, овој пат во Брвеница. Од владејачката партија сметаат дека на нив им одговара токму Филипче да остане на чело на СДСМ и да продолжат да губат на избори. Според соопштението на ВМРО-ДПМНЕ, на локалните избори во Брвеница партијата убедливо победила со предност од околу 800 гласа во однос на кандидатот на ДУИ, а во однос на СДСМ победила со разлика поголема од четири спрема еден. Од вкупно шест кандидати, Стојанчо Радичевски од ВМРО-ДПМНЕ освоил 2.945 гласови. Од ВМРО-ДПМНЕ наведуваат дека СДСМ и Венко Филипче доживеале уште еден изборен дебакл во Брвеница и уште еден сериозен изборен неуспех. Како што соопштија, СДСМ се наоѓа на четвртото место, со повеќекратно помала поддршка од ВМРО-ДПМНЕ, и токму затоа сметаат дека Филипче не треба да си поднесе оставка. „Сè додека тој управува со СДСМ и е послушник на Зоран Заев, граѓаните тоа ќе го препознаваат и ќе се одлучат за работа и за резултати и за борба за иднина каква нуди Владата предводена од ВМРО-ДПМНЕ“, порача партијата во соопштението. Од ВМРО-ДПМНЕ на СДСМ им го честитаа освоеното четврто место и им посакаа, како што наведоа, уште многу вакви резултати со Венко Филипче на чело. Партијата порача и дека продолжува со работа, одговорност и со јасна цел — победа на 1 ноември и иднина со повеќе резултати за сите граѓани на Брвеница, без разлика на нивната етничка припадност. Од ВМРО-ДПМНЕ нагласија дека целта им е Брвеница да биде општина на сите нејзини жители, со подобри услови за живот, нови можности и конкретни проекти што ќе донесат вистински напредок. За вториот круг од локалните избори во Брвеница, од партијата порачаа дека очекуваат рекордни 4.000 гласови.