ВМРО-ДПМНЕ: Правосудството е бастион на СДС и ДУИ, ги штити Филипче и Заев

ВМРО-ДПМНЕ преку соопштение го обвини македонското правосудство дека наместо да биде во служба на правдата и граѓаните, се претворило во бастион на СДС и ДУИ кој ги штити поранешните функционери на овие партии, меѓу кои и Венко Филипче и Зоран Заев. Од партијата тврдат дека дел од судиите и обвинителите, кои ги нарекуваат остатоци на СДС и ДУИ, овозможуваат избегнување кривична одговорност преку укинување пресуди, стопирање истраги и враќање предмети на повторно постапување.

Како примери за ваквото постапување, ВМРО-ДПМНЕ ги посочува случајот со автобуската несреќа на Дурмо Турс кај Ласкарци, во која загинаа 16 лица, пожарот во модуларната болница во Тетово со 14 жртви, како и случајот Мазут, за кој партијата тврди дека станува збор за предмет тежок 167 милиони евра. Според соопштението, во случајот Дурмо Турс е укината пресудата, додека истрагата за пожарот во модуларната болница е затворена и нема обвинение за кривична одговорност против Венко Филипче. Од ВМРО-ДПМНЕ посочуваат и дека е запрена истрагата за случајот Мазут.

Партијата оценува дека овие случувања не се случајност, туку последица на правосуден систем кој, како што тврдат, бил воспоставен од СДС и ДУИ и продолжува да ги штити нивните луѓе и интереси. „СДС и ДУИ ја загубија власта, но нивните судии и обвинители останаа нивното последно упориште за одбрана на нивниот криминален систем што го создаваа со години“, велат од ВМРО-ДПМНЕ.

Од партијата ги споменуваат Ислам Абази, Вилма Русковска, Добрила Кацарска и Африм Фидани, за кои тврдат дека се дел од структури кои ги штитат поранешните државни функционери на СДС и ДУИ. ВМРО-ДПМНЕ оценува дека кога лица поврзани со СДС и ДУИ треба да одговараат пред правдата, предметите се развлекуваат, истрагите се затвораат, а пресудите се укинуваат.

„Од Ласкарци и Модуларната до случајот Мазут, истата правосудна мрежа ги штити истите политички структури“, наведуваат од партијата, додавајќи дека токму поради тоа, според нив, правосудството повеќе не служи на граѓаните, туку на интересите на поранешните владејачки структури.

Според соопштението на ВМРО-ДПМНЕ, ваквата состојба покажува дека и покрај промената на власта, дел од правосудните институции останале под влијание на СДС и ДУИ, што, како што тврдат, го попречува расчистувањето на најтешките случаи од изминатиот период.

Партијата смета дека само целосно расчистување на овие предмети и одговорност за сите вмешани, без разлика на политичката припадност, може да го врати довербата во правосудниот систем. Од ВМРО-ДПМНЕ порачуваат дека ќе продолжат да инсистираат на одговорност за случаите што, според нив, со години остануваат нерешени.