Владиниот предлог-закон за градежно земјиште помина на комисија — што предвидуваат петте измени
Автор: Редакција на FinPortal.mk ·
Предлогот на закон за изменување и дополнување на Законот за приватизација и закуп на градежно земјиште во државна сопственост денеска го помина првиот филтер во Собранието. Пратениците на седницата на Комисијата за финансирање и буџет го прифатија предлогот, по што тој ќе оди на понатамошно читање. Директорот на Управата за имотно-правни работи, Зоран Крстаноски, пред пратениците образложи дека целта на предложените законски измени е да се надминат утврдените проблеми во досегашната примена на законот, да се допрецизираат условите и постапките за приватизација на градежното земјиште и да се обезбеди поголема правна сигурност за граѓаните и правните лица. Крстаноски посочи дека во текот на досегашната примена на законот се утврдило оти одредени законски решенија создаваат тешкотии во постапувањето, особено во случаите кога постојат повеќе сопственици на објекти на иста градежна парцела или кога станува збор за објекти во етажна сопственост, како и во постапки поврзани со претходно запишани права на користење на градежното земјиште. Тој појасни дека предлогот содржи пет јасни и прецизни измени. Првата значајна измена се однесува на укинувањето на одредбите за воспоставување на ограничен времен закон на градежното земјиште во државна сопственост. Досегашната практика покажала дека овие одредби се неприменливи и создаваат правна нееднаквост во однос на лицата што своите права ги остваруваат согласно Законот за градежно земјиште. Поради тоа се предлага нивно бришење, а со соодветната измена законот во иднина ќе го носи називот Закон за приватизација на градежно земјиште во државна сопственост. Втората значајна измена се однесува на допрецизирање на категориите лица кои можат да го остварат правото на приватизација на градежно земјиште. Со предложените решенија се опфаќаат лицата кои се прогласени за наследници на правата што произлегуваат од законот, како и лицата на кои им е пренесено правото за продолжување на постапката за приватизација во случаи кога и претходно бил