02.11.2026 - Витаминка АД Прилеп - Други ценовно чувствителни информации

Прилепската прехранбена компанија „Витаминка“ АД Прилеп за периодот јануари – септември 2026 година оствари позитивен финансиски резултат, покажуваат неревидираните единечни финансиски извештаи објавени преку системот СЕИНет.

Вкупните единечни приходи во првите девет месеци од годинава изнесуваат 3.187.013 илјади денари, што во споредба со истиот период лани претставува раст од 5 отсто. Во структурата на приходите, 99 отсто се остварени од продажба на производи и услуги од основната дејност, додека 1 отсто отпаѓа на останати приходи.

Вкупните единечни расходи за извештајниот период изнесуваат 3.159.293 илјади денари и се за 6 отсто повисоки од остварените во истиот период минатата година. Од компанијата наведуваат дека висината на расходите е во корелација со работењето во периодот.

Добивката по оданочување изнесува 45.267 илјади денари, што е за 19 отсто повеќе од добивката остварена во истиот период лани.

Остварените приходи претставуваат исполнување од 78 отсто од планот, кој за анализираниот период предвидувал 4.111.800 илјади денари. Нецелосното реализирање на планот од компанијата го објаснуваат со зголемените цени на одредени клучни репроматеријали, што создало дополнителен ценовен притисок врз формирањето на продажните цени на готовите производи на странските пазари, предизвикан од воениот конфликт на Блискиот Исток.

Како што се наведува во образложението, предложените повисоки продажни цени не биле целосно прифатени од одредени пазарни сегменти, особено на ценовно сензитивните пазари, поради што се јавила потреба цените да се задржат на пониско ниво со цел зачувување на пазарната позиција и долгорочните деловни односи.

Растот на приходите се должи на зголемената продажба на сончогледово масло за јадење и на флипс производите на странските пазари, што делумно го амортизирало неисполнувањето на планираните проекции кај останатите производни категории.

Од компанијата наведуваат и дека внимателно ги следат состојбите поврзани со воениот конфликт на Блискиот Исток и дека приоритет им е навремено информирање и проценка на сите потенцијални ризици што би можеле да влијаат врз работењето, партнерите и вработените. Според последните макроекономски индикатори наведени во образложението, инфлацијата во Република Северна Македонија во 2026 година се движи просечно околу 3–4 отсто, што претставува стабилизација во однос на претходните години со повисоки ценовни шокови, а стапката на економски раст се движела умерено, под влијание на инвестициите и извозната активност.