Венсан Компани се врати на работното место во клупската база на Баерн Минхен
Автор: Редакција на FinPortal.mk ·
Тренерот на Баерн Минхен, Венсан Компани, утрово се врати во клупската база на „Зебенер Штрасе“ по неколкунеделната пауза предизвикана од здравствени проблеми, што претставува добра вест за навивачите на баварскиот гигант. Белгискиот стратег пристигнал на своето работно место нешто по 10 часот, по периодот во кој тимот го предводеа неговите помошници. На клупската база Компани бил пречекан од својот помошник Флорибер Нгалула, а потоа имал и подолг разговор со спортскиот директор Кристоф Фројнд. Од прозорецот на својата канцеларија го следел тренингот на повредените фудбалери, меѓу кои се Луис Дијаз и Џамал Мусијала. Да потсетиме, на 23 октомври белгискиот стручњак колабираше покрај теренот за време на тренингот на вториот тим на Баерн и итно беше пренесен во болница. При падот го изместил и рамото, а по деталните медицински прегледи му била дијагностицирана иритација на мозочните обвивки, по претходна инфекција и силни главоболки. Во негово отсуство, тимот успешно го предводеа помошниците Арон Данкc и Рене Марич. Под нивно водство, Баерн славеше со 2-0 против Атлетико Мадрид во Лигата на шампионите, а пред репрезентативната пауза триумфираше и на гостувањето кај Мајнц со 1-2. „Последните недели уште еднаш потврдија дека тешките моменти ја откриваат силата на луѓето околу нас. Горди сме на единството, карактерот и посветеноста што ги покажаа сите во овој неверојатен клуб. Продолжуваме заедно напред и среќни сме што Венсан се враќа таму каде што припаѓа“, напиша Данкc на својот профил на Инстаграм. Се очекува Компани официјално повторно да седне на клупата на првенствениот натпревар против Келн, закажан за 20 ноември.