Уставниот суд денес повторно расправа за изборните одредби што ја исклучија Левица од платено политичко рекламирање

Уставниот суд на Македонија денес во 9:30 часот повторно ќе расправа и ќе одлучува по иницијативите на партијата Левица за уставноста на одредбите од Изборниот законик со кои оваа парламентарна партија беше исклучена од платеното политичко рекламирање. По јулската седница на која Судот не обезбеди мнозинство за одлука, предметот остана отворен, а од тогаш поминаа повеќе од два месеци, што според партијата е доволно време спорниот случај повторно да се разгледа и да се утврди дали навистина постои уставно оправдување за правило со кое една парламентарна партија е ставена во нерамноправна положба.

Од Левица оценуваат дека денешната седница претставува уште еден тест на политичкиот плурализам во земјата. Како што велат од партијата, во меѓувреме се промени и составот на Судот, откако по оставката на Гоце Наумовски на негово место е избрана Мери Дика Георгиевска, предложена од Судскиот совет и поддржана од владејачкото мнозинство предводено од ДПМНЕ. Така, за истото прашање денес повторно ќе гласа изменет состав на Уставниот суд.

Според Левица, времето поминато од јулската седница требало да биде доволно спорната норма да се согледа од нејзината суштина, а не од политичката удобност што ја создава. Од партијата потсетуваат дека членови од Изборниот законик создадоа ситуација во која Левица како парламентарна партија не можеше да го користи платеното политичко рекламирање на телевизии, радија, интернет-портали и билборди, додека таквата можност им беше достапна на останатите политички субјекти.

„Кога на еден политички субјект му се затвора медиумскиот простор што на другите им е отворен, прашањето неизбежно станува прашање на политички плурализам и еднаквост во изборниот натпревар“, велат од Левица. Од партијата нагласуваат дека на јулската седница дел од судиите го отвориле токму ова прашање — дали еднаквоста на политичките субјекти може да остане само декларативна ако законодавството создава различни услови за нивниот настап пред граѓаните.

Наспроти тие аргументи, како што наведуваат од партијата, биле слушнати и аргументи за правни празнини, политички договори и надлежноста на Собранието да ги поправи спорните одредби. Сепак, од Левица сметаат дека ако нормата е спротивна на Уставот, фактот дека политичкиот систем се навикнал на неа не може да биде алиби за нејзино зачувување.

Од партијата оценуваат и дека е тенденциозно ова прашање постојано да се сведува на пари. Како пример го наведуваат Амар Мециновиќ, кој на локалните избори во 2025 година имаше нула денари платено политичко рекламирање, а сепак влезе во вториот круг за градоначалник на Скопје. Според Левица, тоа покажува дека спорот не е околу тоа колку средства се трошат, туку околу еднаквоста на условите за настап на сите политички субјекти.

Денешната седница на Уставниот суд доаѓа по повеќе од два месеци од претходното разгледување на предметот, кога за одлука не беше обезбедено потребното мнозинство. Од Левица изразуваат надеж дека изменетиот состав на Судот ќе го разгледа прашањето од неговата суштина и ќе утврди дали постои уставно оправдување за нормата што, според нив, една парламентарна партија ја става во нерамноправна положба во однос на останатите политички субјекти.

Од партијата порачуваат дека очекуваат Уставниот суд да одлучува независно од политичките околности и дека денешната расправа ќе покаже дали еднаквоста на политичките субјекти во изборниот процес останува гарантирана или само декларативно прокламирана.