Украинските производители на челик бараат исклучок од царините на ЕУ: „Ставени сме во истиот кош со Кина

Раководителот на една од најголемите украински компании за челик ја повика Европската унија да ги укине увозните ограничувања за украинските производи, оценувајќи дека земјата е „ставена во истиот кош“ со мерките насочени кон ограничување на евтиниот увоз од Кина. Јуриј Риженков, извршен директор на „Метинвест“, за BBC изјави дека неодамна воведените царини за челик што се увезува во ЕУ се „неправедни“ и дека се донесени „без никакво разгледување на ситуацијата во која се наоѓа Украина“.

Трговскиот блок неодамна воведе ограничувања за увоз на челик со цел да ги заштити производителите од земјите-членки. Количината на челик што може да влезе во ЕУ без царина е ограничена на 18,3 милиони тони годишно, што е намалување од 47 отсто во споредба со нивото во 2024 година. Иако политиката предвидува одредени квоти по земји, целта е намалување на вкупниот увоз поради тешкотиите на членките да се натпреваруваат со евтиниот увоз од земји како Кина и Турција. И покрај договорот за слободна трговија меѓу ЕУ и Украина, тој не ја спречува ЕУ да воведе посебни трговски заштитни мерки.

Според проценките на украинската индустрија за челик, извозот во ЕУ на крајот би можел да падне за околу 50 до 60 отсто. Од Европската комисија соопштија дека при креирањето на политиката за челик ја „зеле предвид тешката ситуација“ на Украина и дека нејзината конкретна квота гарантира извоз, но признаа дека тоа е на „ниво пониско од претходните години“. Портпарол на Комисијата додаде дека ЕУ „понудила компензации“ на своите најголеми добавувачи, меѓу кои е и Украина.

Челикот е темел на украинската економија. Пред почетокот на руската инвазија во 2022 година, металургијата и рударството учествуваа со околу 10 отсто од националниот доход и со една третина од извозот, а ЕУ е најголем купувач. Индустријата, сепак, страда од постојаното руско бомбардирање. Сите украински челичарници биле бомбардирани во одреден момент од почетокот на конфликтот, а Риженков вели дека ударите „значително се засилиле во последно време“. Во еден момент во септември, за првпат во околу 150 години, во Украина не бил произведен „ниту еден тон челик“, додаде тој.

Речиси 800 работници на „Метинвест“ загинале од почетокот на војната. Риженков вели дека компанијата ги „подобрила заштитените површини“ во своите погони каде работниците можат да се засолнат за време на воздушни напади. „Единственото што можеме да го направиме е да осмислиме процедури за да ги зачуваме луѓето безбедни и едноставно да ги почитуваме тие процедури и да се обидеме да ги минимизираме ризиците“, рече тој, додавајќи дека „за жал, не можете да покриете цела челичарница за да не биде оштетена“. Тој оцени дека претстојната зима ќе биде „една од најтешките во нашата историја“.