Тужба: Трамп незаконски се збогатил од странски крипто-зделки

Претседателот на САД, Доналд Трамп, и неговата семејна крипто-компанија „World Liberty Financial“ се обвинети дека „коруптивно профитирале“ од повеќе од 2 милијарди долари зделки поврзани со дигитални валути, со што ги прекршиле уставните ограничувања за примање странски пари. Ова се наведува во федерална граѓанска тужба поднесена во четвртокот, пренесува CNBC.

Тужбата е поднесена од акционер и поранешен вработен во „Circle Internet Group“, американска јавно тргувана крипто-компанија и конкурент на семејниот бизнис на Трамп. Во неа се тврди дека „ниту еден претседател во американската историја не профитирал од својата функција толку бесрамно“. Случајот е поднесен пред Федералниот окружен суд во Вашингтон, а се фокусира на две наводно „незаконски странски надоместоци“ поврзани со „World Liberty“ и со шеикот Тахнун бин Зајед Ал Нахјан, советник за национална безбедност на Обединетите Арапски Емирати.

Според тужбата, неколку дена пред инаугурацијата на Трамп во јануари 2025 година, ентитет поддржан од Тахнун се согласил да купи 49 отсто удел во „World Liberty“ за 500 милиони долари. Компанијата тогаш изјавила за „The Wall Street Journal“, кој ја откри трансакцијата во јануари 2026 година, дека Трамп немал никакво учество во зделката. Сепак, според неговите финансиски извештаи, Трамп требало да добие милиони долари од таа куповина откако станал претседател. Тужбата, исто така, истакнува „шема“ на инвестициски фонд со седиште во Абу Даби, на чие чело е Тахнун, за „надувување на вредноста на крипто-холдинзите на претседателот Трамп“ преку минатогодишната куповина на 2 милијарди долари во стабилкоинот USD1 на „World Liberty“.

Тужбата тврди дека ваквото однесување ја прекршува клаузулата за странски надоместоци од Уставот на САД, која им забранува на федералните функционери да примаат пари или други подароци од странски официјални лица без согласност на Конгресот. „Она што го направи претседателот Трамп е бесрамно коруптивно. Тој заработи милиони од овие зделки со тоа што ги продаде американските граѓани“, изјави адвокатот Мет Пеликан од „Evergreen Legal“ за CNBC. „Поднесуваме тужба за да ја спречиме корупцијата и да го принудиме претседателот Трамп да ги врати профитите на американските даночни обврзници“, додаде тој.

Тужбата ги именува Трамп, „World Liberty“ и специјалниот пратеник на САД за Блискиот Исток, Стив Виткоф, како обвинети, заедно со четири поврзани друштва со ограничена одговорност. „Circle“ соопшти дека не стои зад тужбата и не коментира за случаи во тек. „World Liberty Financial е усогласена со сите американски закони и регулативи. Никој во World Liberty Financial не работи за американската влада. Овие тврдења се неосновани и се радуваме што ќе ги решиме на суд“, изјави портпаролот на компанијата, Дејвид Ваксман, за CNBC. Белата куќа и портпаролот на Виткоф не одговорија веднаш на барањата на CNBC за коментар.

Покрај барањето судска декларација дека профитите на Трамп го прекршуваат Уставот, акционерот бара од претседателот да ги открие сите други странски крипто-надоместоци што ги примил и да ги врати сите профити утврдени како незаконски. Трамп и неговото семејство брзо го проширија крипто-бизнисот откако тој се врати во Белата куќа. „World Liberty Financial“, лансирана со членови на семејствата Трамп и Виткоф во 2024 година, управува со стабилкоинот USD1, а ентитет поврзан со Трамп и неговото семејство поседува околу 38 отсто од компанијата. Бизнисот бил високо профитабилен за Трамп, дури и кога инвеститорите во WLFI претрпеле големи загуби. Трамп пријавил повеќе од 1,4 милијарди долари крипто-приходи во годишното финансиско известување за 2025 година, вклучително и речиси 800 милиони долари поврзани со „World Liberty“. WLFI, пак, паднала од околу 45 центи во август 2025 година на околу 5 центи до крајот на јуни 2026 година. Вложувањето предизвикало посебно внимание поради врските со ОАЕ. Неколку месеци по инвестицијата на Тахнун во 2025 година, администрацијата го проширила пристапот на ОАЕ до напредни американски АИ-чипови.