Три американски медиуми поднесуваат тужба против Трамп поради забрана за влез во Белата куќа

Три американски медиумски куќи — MS NOW, CNN и Politico — поднесуваат заедничка тужба против претседателот Доналд Трамп, со која бараат федерален судија да ја поништи неговата целосна забрана за нивниот пристап до Белата куќа. Тужбата се очекува да биде поднесена во понеделник наутро пред Федералниот окружен суд во Вашингтон, пренесува CNBC.

Новинарите од трите редакции не беа пуштени во Белата куќа во саботата, еден ден откако Трамп објави дека им забранува да работат таму. Во објавата на Truth Social, тој ги обвини медиумите дека пишуваат измислици и лаги за него и предупреди дека „следат и други лажни медиумски куќи“. Како причина ги наведе она што го нарече „кумулативни стории“ на трите редакции, додавајќи: „Ти доаѓа преку глава.

Во тужбата се наведува дека забраната претставува директен напад врз Првиот амандман и очигледно кршење на најфундаменталните уставни принципи. Се потсетува дека претседателите уште од најраните денови на Републиката не се согласувале со тонот и содржината на новинарското известување за нивните администрации, но дека Уставот ги штити слободата и имотните интереси на новинарските организации и на новинарите во Белата куќа врз основа на нивните акредитации. „Ниту еден функционер не може да ги лиши тужителите од тие интереси по каприц — без известување, без постапка и без предупредување — како што тоа го направи претседателот“, се вели во тужбата.

Во заедничката изјава од понеделникот, трите редакции порачаа дека ја известиле владата оти поднесуваат тужба за да ги заштитат своите права од Првиот амандман и да го одбранат принципот дека владата не одлучува што објавува печатот. „Без известување и без постапка, Белата куќа ни ги одзеде акредитациите на нашите новинари затоа што имаше забелешки на нашето известување“, се наведува во изјавата. „Ако остане неоспорено, ова ја загрозува слободата на печатот и правото на јавноста на независно новинарство, без владино мешање.

Трите редакции ќе поднесат заеднички предлог до судијата за издавање привремена забрана со која на Трамп и на останатите обвинети ќе им се забрани да преземаат дополнителни мерки за спроведување на забраната и ќе се побара веднаш да им се вратат таканаречените постојани новинарски акредитации. Освен Трамп, меѓу обвинетите се неговиот помошник за комуникации Стивен Ченг, шефот на кабинетот на Белата куќа Сузан Вајлс и Шон Куран, директор на американската Тајна служба.

Во неделата навечер, Белата куќа ја отстрани CNN од планираната ротација како телевизија во новинарскиот пул што го следи претседателот. Пулот требаше во понеделник да патува со Трамп за Њујорк, каде што тој ќе присуствува на Генералното собрание на Обединетите нации. Тужбата се поднесува пред истиот суд каде што агенцијата Associated Press веќе има отворен спор против Белата куќа поради забраната за нејзините новинари во одредени ограничени простории, меѓу кои и Овалната соба и авионот Air Force One. Таа делумна забрана беше воведена во февруари 2025 година, откако агенцијата одби да го користи новото име на Мексиканскиот залив што го наметна Трамп.

Трамп во петокот им изјави на новинарите дека вреди да се спроведе најновата забрана, дури и ако судијата ја поништи. „Мислам дека е добро да се укаже на тоа, без разлика дали ќе опстане или не“, рече тој. Институтот за Прв амандман „Најт“ при Универзитетот Колумбија, во соопштение по објавата на Трамп, оцени дека тој ќе го загуби судскиот спор поради уставните гаранции за медиумите. „Првиот амандман му забранува на претседателот да ги казнува новинарите затоа што не му се допаѓа нивното известување, исто како што му забранува да ги казнува универзитетите затоа што не му се допаѓаат предметите што ги нудат“, изјави Џамил Џафер, извршен директор на институтот.