Треновски: Прво да го искористиме домашниот кадар, потоа да увезуваме работници
Автор: Редакција на FinPortal.mk ·
Македонија мора најпрво целосно да ги искористи расположливите домашни човечки ресурси, пред да се потпре на увоз на работна сила од странство. Ова го порача универзитетскиот професор Борче Треновски во емисијата „Ноќно студио“ на 4ТВ, каде анализираше зошто одредени сектори во земјава не можат да најдат соодветни работници. Според Треновски, македонскиот пазар на труд се соочува со сериозен парадокс — во исто време има невработени граѓани и компании што не успеваат да најдат соодветен кадар. „Нашиот пазар на труд е многу специфичен. Ова не е поврзано само со бројот на лица што ги имаме, туку со усогласеноста на вештините што ги поседуваат тие лица“, истакна професорот во емисијата. Недостигот од работници, како што посочи Треновски, е изразен во повеќе дејности — меѓу кои земјоделството, услужниот сектор, транспортот и одредени технички професии. Но, и покрај тоа, тој смета дека државата располага со значителен неискористен потенцијал. Во него ги вбројува долгорочно невработените лица, економски неактивните граѓани, како и оние што работат неформално. „Пред да решиме да донесеме работници од странство, мораме да ги исцрпиме сите фондови што ги имаме тука. Сè уште имаме огромна неактивна работна сила“, нагласи Треновски. Тој особено ја истакна потребата од поголемо вклучување на жените на пазарот на труд, како и од преквалификација на граѓаните што со години не можат да најдат вработување. Професорот призна дека увозот на работна сила е тренд што не го заобиколува ниту остатокот од Европската Унија, но останува на ставот дека домашните резерви треба да бидат првиот чекор. „Мораме да го искористиме целиот домашен потенцијал пред да решиме да донесеме работна сила од страна, иако тоа се процеси што се случуваат во целата Европска Унија и можеби понатаму нема да можеме да се изолираме“, рече тој. Како клучен дел од решението, Треновски го посочи образовниот систем, кој според него мора да се приспособи на реалните потреби на стопанството. Тој предложи посистематска про