Трамп: Стравувањата за безбедноста на вештачката интелигенција се „измама

Американскиот претседател Доналд Трамп ги оцени стравувањата за безбедноста на вештачката интелигенција како „измама“ и ги критикуваше повиците за воведување построги контроли врз оваа технологија што се развива со забрзано темпо. Во низа објави на социјалните мрежи во понеделникот, тој предупредувањата за вештачката интелигенција ги спореди со „измамата со глобалното затоплување“, за која тврди дека ја спроведува „радикалната левица“. Трамп себеси се нарече „разбивач на измами“, а загриженоста за безбедноста на технологијата ја спореди со „измамата Русија, Русија, Русија“.

Во претходна објава, американскиот претседател напиша дека се води „болна завера против вештачката интелигенција и дата-центрите, а единствениот што е задоволен од тоа е Кина“, додавајќи дека „кој победи во трката за вештачка интелигенција, победува“. Неговите коментари доаѓаат откако Џек Кларк, коосновач на технолошкиот гигант Anthropic, изјави за BBC дека „прекинувач за итни случаи“ за опасна вештачка интелигенција, кој би можел да го проверува трета страна, можеби ќе треба да биде задолжителен за индустријата.

Кларк, еден од седумте основачи на Anthropic, рече дека начинот целосно да се исклучи софтверот за вештачка интелигенција доколку стане премногу опасен е нешто за што општеството „можеби на крајот ќе сака да донесе правила“. Тој додаде дека „повеќето лаборатории имаат различни начини да го исклучат системот“, вклучително и Anthropic, но оцени дека законодавците можеби ќе треба да го наметнат тоа како обврска. Неговите изјави доаѓаат по предупредувањата за ризиците што технологијата ги носи за човештвото, кои во последните денови ги изнесоа неколку раководители и вработени во водечките компании за вештачка интелигенција.

Тие загрижености предизвикаа распродажба на акциите на некои технолошки компании во понеделникот, додека инвеститорите ја проценуваа можноста за забавување на развојот на вештачката интелигенција. Во меѓувреме, кинеските државни медиуми објавија дека експерти предупредуваат оти „растечката загриженост на Вашингтон поради брзиот развој на вештачката интелигенција во Кина сè повеќе ги искривува неговите политички приоритети“. Според професорот по американски студии на Универзитетот Фудан, Ксин Ќанг, „тие знаат дека Кина стана силен конкурент во вештачката интелигенција и се плашат дека ако САД го забават развојот или ја затегнат регулативата, Кина би можела да се изедначи уште побрзо“.

Дебатата за потенцијалните опасности од технологијата се засили откако објавата на истражувачот Џејкоб Коксон, кој ја напушти Anthropic поради загриженост дека вештачката интелигенција може да го уништи човештвото, стана вирална. Како одговор, научникот од Anthropic, Еван Хубингер, изјави дека смета оти можноста вештачката интелигенција да предизвика изумирање на човештвото „во следната деценија“ е повеќе од 10 отсто. За време на викендот, извршниот директор на Anthropic, Дарио Амодеи, повика темпото на развој на вештачката интелигенција да се забави и потемелно да се следи, но истакна дека секоја акција за ограничување на технологијата треба да се спроведе „без жртвување на комерцијалната предност“. Со неговиот предлог за забавување и регулација на индустријата, како и за независно следење на развојот на моделите, се согласија и раководителите на две конкурентски компании — Сем Алтман од OpenAI и Илон Маск од xAI.