Тинекс го задржува името и брендот — Проекс Интернационал влегува во македонскиот пазар со долгорочна инвестиција

Тинекс, еден од најпрепознатливите синџири супермаркети во Македонија со повеќе од 30 години историја, влегува во ново поглавје на развој по неговото преземање од страна на Проекс Интернационал. Според информациите, името и брендот Тинекс остануваат непроменети, а новиот сопственик најавува стратешка, долгорочна инвестиција во македонскиот малопродажен пазар.

Преземањето ги обединува воспоставеното пазарно присуство на Тинекс, локалното искуство и односите со потрошувачите со регионалното искуство на Проекс Интернационал во малопродажбата и современите капацитети за управување со супермаркети. Инвестициски советник на Тинекс во оваа трансакција беше македонската компанија за спојувања и преземања Ахиос.

Проекс Интернационал претходно го презеде Интерекс од Интермарше, една од најголемите француски малопродажни групации. Со инвестицијата во Тинекс, Проекс Интернационал го зајакнува своето присуство во регионалниот малопродажен сектор и ја потврдува својата доверба во потенцијалот на македонскиот пазар.

По преземањето на Интерекс, Проекс Интернационал го зачува воспоставениот оперативен модел, методите на работа и професионалните стандарди наследени од Интермарше, продолжувајќи истовремено да ги развива и унапредува паралелно со растот на Интерекс. Ова искуство сега ќе го поддржи развојот на Тинекс, комбинирајќи докажани малопродажни практики со разбирање на регионалните пазари и потребите на локалните потрошувачи.

Деловното искуство на групацијата се протега и надвор од секторот на супермаркети, преку нејзините активности како корисник на франшизи и лиценци на меѓународно признати брендови, вклучувајќи ги Shell, IP (Gruppo API), Darty и Nordsee. Ова пошироко искуство во работењето според меѓународни стандарди на брендови дополнително ја зајакнува експертизата што Проекс Интернационал ја носи во модернизацијата и долгорочниот раст на Тинекс.

Повеќе од три децении, Тинекс е важен дел од македонскиот малопродажен сектор. Новиот сопственик го препознава придонесот на семејството Тодоровиќ, чија претприемачка визија и посветеност го изградија Тинекс во доверлив и препознатлив бренд на супермаркети. Проекс Интернационал изразува благодарност до семејството Тодоровиќ за создавањето на компанијата, развојот на нејзиното пазарно присуство и поставувањето на темелите за нејзиното следно поглавје.

Од семејството Тодоровиќ порачуваат дека за нив Тинекс никогаш не бил само компанија, туку 30 години работа и врска со вработените и потрошувачите, која ја граделе продавница по продавница. Тие изразуваат уверување дека новиот сопственик ќе го продолжи тој пат и ќе го развива брендот со истите вредности.

Според достапните информации, трансакцијата е завршена, а Проекс Интернационал веќе отвора ново поглавје во работењето на Тинекс, со јасна порака дека брендот, вработените и односот со потрошувачите остануваат во центарот на вниманието. Компанијата најавува дека ќе продолжи да инвестира во модернизација и развој, потпирајќи се на локалното знаење и меѓународното искуство во малопродажбата.