Тетовската библиотека „Кочо Рацин“ станува универзитетска — првпат во историјата
Автор: Редакција на FinPortal.mk ·
Библиотеката „Кочо Рацин“ во Тетово за првпат добива статус на универзитетска библиотека, откако е усвоена одлука за проширување на нејзината дејност. Одлуката е донесена на предлог на министерот за култура и туризам, Седат Сулејмани, а информацијата ја соопштија од партијата ВЛЕН. Според соопштението, со новиот статус студентите, професорите и истражувачите ќе имаат поголеми можности за користење на литературата и библиотечните услуги. Од ВЛЕН објаснуваат дека за подготовка на испити, пишување дипломска работа или научно истражување е потребна соодветна литература, а со универзитетскиот статус библиотеката ќе може подобро да одговори на овие потреби. Од партијата нагласуваат дека библиотеката и понатаму ќе продолжи да им служи на сите граѓани, а не само на академската заедница. „Зад секој студент стои и трудот на неговото семејство. Работиме студентите и нивните семејства да ја добијат потребната поддршка, а младите да имаат можности да се развиваат тука, во својата земја. За тоа сме во власта и за тоа работиме секој ден“, велат од ВЛЕН. Одлуката за проширување на дејноста на тетовската библиотека претставува прв случај таа да добие универзитетски статус, што според соопштението ќе овозможи подобри услови за академско и научно работење во регионот.