Светските цени на храната скокнаа на највисоко ниво од 2022 година
FinPortal.mk · 2.10.2026 г.
Светските цени на храната во септември 2026 година се искачија на највисокото ниво во речиси четири години, што претставува сериозен удар врз најранливиот дел од светската популација. Индексот на цените на храната на Организацијата за храна и земјоделство на Обединетите нации (ФАО) изнесуваше 136 поени, во споредба со ревидираните 134 поени во август, што е највисоко ниво од ноември 2022 година. Според податоците на ФАО, пазарите на земјоделски производи биле погодени од логистички пречки и загриженост поради временските услови. Во септември, индикативните цени за житарките, шеќерот и растителните масла пораснаа, додека цените на месото и млечните производи опаднаа. Загриженоста поради силниот временски феномен „Ел Нињо“ ги подигна меѓународните цени на шеќерот на највисоко ниво во последните 18 месеци. Истовремено, намалувањето на трговијата во регионот на Црното Море поради војната, на почетокот на минатиот месец, ги подигна фјучерс-цените на пченицата на највисоко ниво во последните три години. Главниот економист на ФАО, Максимо Тореро, изјави дека пречките во Ормускиот теснец и во Црното Море, заедно со климатските шокови, вршат притисок врз енергетиката, транспортот и клучните прехранбени производи. Според него, доколку овие фактори продолжат, тие би можеле да се одразат врз потрошувачките цени, првенствено во земјите што зависат од увоз на храна и енергија. ФАО речиси и да не направи промени во својата прогноза за глобалното производство на житарици во 2026 година, задржувајќи ја на ниво од 2,979 милијарди тони. Ова е за 2,1 отсто помалку од рекордното ниво од претходната година, но сепак претставува втора најголема жетва досега. Организацијата, исто така, ја намали прогнозата за глобалната трговија со житарици во сезоната 2026/27 година за 0,7 отсто поради помалите очекувања за извоз на пченица и пченка, делумно и поради ограничувањата во поморскиот сообраќај во Црното Море. Организацијата за храна и земјоделство предупреди дека, доколку сегашните притисоци п