Судскиот процес за трагедијата во Кочани продолжува со изјаснување на одбраната и оштетените

Во судницата во Идризово денеска продолжува судењето за пожарот во дискотеката „Пулс“ во Кочани, трагедија во која загинаа 63 лица, меѓу кои и деца, а над 200 лица беа повредени. Денешното рочиште треба да продолжи со произнесување на вина и воведни зборови на одбраната, а постапката се следи во живо преку официјалните канали на МИА на Јутјуб и Фејсбук.

На претходното рочиште Судот ги прифати приговорите на дел од бранителите дека обвинението интегрирано со листата на докази не им било доставено на обвинетите. Судот информираше дека материјалите ќе им бидат доставени, а следната закажана расправа беше одложена за да имаат доволно време да се запознаат со нив. Со цел да не дојде до одолговлекување на постапката, Судот донесе одлука главната расправа да продолжи со изјаснување по однос на оштетени побарувања и на кривичен прогон на присутните оштетени и нивните законски застапници.

Присутните законски застапници на оштетените пред Судот изјавија дека се приклучуваат кон кривичниот прогон и дека своите права и оштетно побарување ќе ги остваруваат во граѓанска постапка. Судењето се одвива под засилени безбедносни мерки, а покрај обвинетите, во судницата се присутни и роднини на настраданите во несреќата, претставници на обвинителството и на одбраната, како и домашни и странски новинари.

Постапката ја води судијката Диана Груевска Илиевска, а обвинителството е застапувано од тим составен од 15 јавни обвинители. Обвинителот Борче Јанев на првото рочиште за трагичниот пожар истакна дека се бара одговорност по име и презиме, а општеството мора да се соочи со болната вистина и да извлече легитимни одговори за тоа кој дозволил, кој молчел и кој не спречил. Како што рече, се бара правда не како утеха или одмазда, туку како последица на незаконитост.

Јанев нагласи дека не е важно само кој го запалил огнот, туку е важно кој имал кофа вода и не ја истурил. Според него, катастрофата не е резултат само на пиротехниката, туку на години институционален молк, пропусти и недостиг од контрола кои го претвориле клубот во „смртоносна стапица“. Обвинителот изрази уверување дека доказите ќе покажат оти клубот „Пулс“ бил смртоносна стапица уште од самиот почеток.

Трагедијата од 16 март 2025 година, според Обвинителството, е резултат на систематска негрижа и игнорирање на безбедносните закани. Дискотеката функционирала без противпожарен систем, со затворени прозорци и со лесно запаливи материјали, што придонесло за брзото ширење на огнот и големиот број жртви.

Случајот предизвика силна реакција во јавноста и стана еден од најтешките безбедносни и правни предизвици во земјата во последните години. Судењето продолжува со фокус на утврдување на одговорноста на сите вклучени страни, а роднините на настраданите со нетрпение очекуваат правда за загубените животи.