Субхи Јакупи избран за претседател на Управниот суд
Автор: Редакција на FinPortal.mk ·
Судскиот совет на денешната седница го избра Субхи Јакупи, судија во Вишиот управен суд, за нов претседател на Управниот суд. Одлуката е донесена по спроведена постапка и гласање по извештајот со предлог-листата на кандидати за претседател на овој суд, а Советот оцени дека неговата програма, досегашното искуство и познавањето на управното судство го издвојуваат меѓу пријавените кандидати. Во расправата пред гласањето, повеќе членови на Советот ја истакнаа неговата способност за раководење, искуството што го стекнал во Вишиот управен суд и квалитетот на програмата што ја презентирал. Исамедин Лимани оцени дека Јакупи добро ќе раководи со судот, додека Ивица Стефановски како аргумент за неговиот избор ја наведе и правичната застапеност. Данка Ристова посочи дека неговата програма се издвојува од програмите на останатите кандидати и дека во неа се препознава учеството на Јакупи во конституирањето на управното судство, при што биле јасно лоцирани и слабостите во системот. Поддршка за неговиот избор дадоа и Садула Изаири, кој се повика на програмата, личните квалитети и претходното искуство на кандидатот, како и Џенета Бегтовиќ, која нагласи дека Јакупи бил заменик-претседател на Вишиот управен суд и на тој начин стекнал значително искуство во управување со судска институција. Арлинда Кадри-Шахиновиќ се приклучи кон позитивните оценки за кандидатот, а Тања Чачарова-Илиевска истакна дека седумгодишното искуство во Вишиот управен суд е доволно за да ги согледа состојбите и проблемите во управното судство. Поддршка изразија и Аритон Ала, кој му го честиташе изборот, како и Владо Камбовски, кој оцени дека Јакупи ја понудил најдобрата програма. Против неговиот избор се изјасни Сузана Јошевска, според која Јакупи е кандидатот со најмал судиски стаж меѓу пријавените и единствениот кој нема судиски стаж во судот со кој треба да раководи. Таа оцени и дека неговата програма содржи цели, но тие не се доволно разработени. За функцијата претседател на Управниот суд биле пријавени пет