Студентите Албанци бараат целиот правосуден испит да се полага на албански, најавуваат нови протести

Студентите Албанци на Универзитетот „Мајка Тереза“ во Скопје не се откажуваат од барањето целиот правосуден испит да го полагаат на албански јазик, и покрај предлогот на министерот за правда Јетон Шасивари, кој предвидува најголемиот дел од испитот да се полага на албански. Студентскиот правобранител Сухејб Мехмеди по средбата со министерот изјави дека предложеното решение го сметаат за успех, но дека нема да бидат задоволни сè додека и преостанатите два предмети не бидат опфатени со можноста за полагање на албански јазик.

Според предлогот на министерот Шасивари, теоретскиот дел од испитот, кој опфаќа 12 предмети, ќе може да се полага на албански јазик, додека практичниот дел, односно два предмети, ќе се полага на македонски јазик. Мехмеди појасни дека околу 84 отсто од испитот ќе се полага на албански, но дека студентите инсистираат јазичната можност да важи за сите делови од испитот.

„Нашето барање е целиот правосуден испит да го полагаме на албански јазик. Предлогот на министерот е победа за нас бидејќи околу 84 отсто од испитот ќе се полага на албански јазик. Не сме задоволни бидејќи два испита треба да се полагаат на македонски јазик“, рече Мехмеди.

Тој изнесе ставот на студентите дека барањето има законска основа, повикувајќи се на Уставот и на Законот за употреба на јазиците. „Имаме Закон за употреба на јазиците, кој им дозволува на албанските студенти правосудниот испит да го полагаат на албански јазик. Ние не бараме ништо освен да се почитуваат Уставот и законите“, изјави Мехмеди.

Студентскиот правобранител потсети дека досега биле организирани два протеста и дека студентите со излегувањето на улица успеале да го актуализираат своето барање. „Направивме два протеста, излеговме на улица. Бараме нашите барања да се почитуваат. Ова е наш голем успех бидејќи го добивме тоа што ни следува, но не сме задоволни“, порача Мехмеди.

Студентите најавуваат продолжување на протестите доколку не се овозможи целиот правосуден испит да се полага на албански јазик. Тие остануваат на ставот дека правото на полагање на испитот на албански јазик треба да важи за сите негови делови, а не само за теоретскиот дел, и дека се подготвени повторно да излезат на улица за да го остварат тоа барање.