Стојков: Бугарските судови измислуваат нови барања за регистрација на ОМО „Илинден“ – Пирин

Копретседателот на организацијата на Македонците во Бугарија ОМО „Илинден“ – Пирин, Стојко Стојков, остро ги отфрли тврдењата дека оваа организација доставува некомплетни документи за судска регистрација, оценувајќи ги како целосна невистина. Според него, вистинскиот проблем не е во недостаток на документи, туку во тоа што надлежните бугарски органи постојано измислуваат нови и нови барања.

Реакцијата на Стојков доаѓа откако актуелната бугарска претседателка Илијана Јотова изјави дека проблемот со нерегистрирањето на македонската организација во Бугарија се должи на тоа што таа доставува некомплетни документи. Јотова тоа го изјави по средбата со генералниот секретар на Советот на Европа, Ален Берсе, во Стразбур, каде што станало збор и за спроведувањето на пресудите на Европскиот суд за човекови права во полза на Обединетата македонска организација „Илинден“.

Според изјавата на бугарската претседателка пред новинарите во Стразбур, таа го потцртала бугарскиот став за да чуе Берсе од прва рака дека Бугарија ги спровела сите свои препораки до овој момент. Јотова навела дека е променет законот заедно со Агенцијата за регистрација за да можат организациите да се регистрираат таму, но дека „за жал, тие секојпат пропуштаат по некој документ“.

За Стојков, ваквото тврдење не одговара на фактичката состојба. Тој нагласува дека кога организацијата поднесува документи, тие се поднесуваат по урнекот на документите на регистрирани организации, кои самите бугарски власти ги препорачале како перфектни. „Тоа е комплетна невистина. Кога поднесуваме документи, ние ги поднесуваме по урнекот на документите на регистрирани организации препорачани од бугарските власти како перфектни. Целите се различни. И кога ќе поднесеме ние документи, наеднаш судот наоѓа десетици проблеми што не ги видел порано“, реагира копретседателот на ОМО „Илинден“ – Пирин.

Стојков дополнително објаснува дека судовите на секое ниво даваат различни забелешки, а различни судови во различни делови на земјата даваат различни забелешки. Според него, дури и кога организацијата ќе постапи по тие забелешки, се наоѓаат нови. „Судовите на секое ниво даваат различни забелешки. Различни судови во различни делови на земјата даваат различни забелешки и ако постапиме по нив, наоѓаат нови“, наведува тој.

На прашањето дали, по изјавата на Јотова, може да се очекува на оваа организација на Македонците во Бугарија јасно и конечно да ѝ се каже кои документи недостигаат, Стојков е скептичен. „Проблем е што нема такво нешто, сето го исполнуваме, но тие само си измислуваат. Треба да запрат да го нарушуваат законот и да нè регистрираат“, потенцира Стојков.

Стојков ја искористи и можноста да укаже на поширокиот контекст на случајот, нагласувајќи дека Бугарија се повикува на човековите права и бара уставни измени од Македонија, додека самата игнорира 14 пресуди од Стразбур кои ѝ стојат „на биро“. Според него, ваквата состојба е спротивна на декларираните заложби за почитување на меѓународните правни обврски.

Организацијата ОМО „Илинден“ – Пирин со години се соочува со правни пречки при обидот да се регистрира во Бугарија, и покрај повеќекратните пресуди на Европскиот суд за човекови права во нејзина полза. Случајот е дел од поширокиот спор меѓу Скопје и Софија околу правата на македонското малцинство во Бугарија, кој останува отворен и покрај дипломатските напори за негово решавање.