ССКМ денеска организира тркалезна маса за дигитален товарен лист и отворени граници во транспортот
Сојузот на стопански комори на Македонија (ССКМ) денеска организира тркалезна маса за транспорт и логистика, посветена на имплементацијата на електронскиот товарен лист (е-ЦМР) и создавањето услови за побрз, поефикасен и дигитализиран транспорт. Настанот се одржува под мотото „Кон транспорт без хартија и без бариери – Дигитален товарен лист, отворени граници“.
Како што најави ССКМ, на тркалезната маса на едно место ќе се сретнат претставници на бизнис-заедницата и клучните државни институции, со цел да се отворат конкретни прашања поврзани со воведувањето на е-ЦМР и надминувањето на административните и институционалните бариери во транспортот и логистиката.
Од Сојузот на стопански комори на Македонија оценуваат дека имплементацијата на електронскиот товарен лист претставува важен чекор кон дигитализација и модернизација на транспортниот сектор. За негово целосно функционирање, како што информира ССКМ, потребни се интероперабилност на системите, координација меѓу институциите и воспоставување заедничка институционална архитектура преку едношалтерски систем (One Stop Shop).
На тркалезната маса ќе биде презентиран предлог-моделот за ваквата институционална архитектура, како и потребните законски измени и институционални чекори за успешна имплементација на системот. Целта е преку директен дијалог меѓу јавниот и приватниот сектор да се дефинираат конкретни решенија што ќе овозможат помалку документација, побрзи процедури, поефикасен проток на стоки и намалување на времето и трошоците за транспортните и логистичките компании.
На настанот се очекува учество на претставници од Министерството за транспорт, Министерството за финансии и институциите под негова надлежност – Управата за јавни приходи и Царинската управа, Министерството за економија, Министерството за надворешни работи, Министерството за европски прашања, Кабинетот на претседателот на Владата, Министерството за дигитална трансформација и Министерството за внатрешни работи – гранична полиција.
Тркалезната маса претставува обид за поврзување на јавниот и приватниот сектор околу еден од клучните предизвици на транспортниот сектор – преминот од хартиена кон дигитална документација. Воведувањето на електронскиот товарен лист, како што беше најавено, треба да придонесе кон намалување на административните товари и кон забрзување на протокот на стоки преку границите.
Преку дијалогот меѓу бизнис-заедницата и институциите, организаторите очекуваат да се дефинираат конкретни решенија кои ќе им овозможат на транспортните и логистичките компании да работат со помалку документација, побрзи процедури и намалени трошоци. Со тоа, како што беше посочено, се создаваат услови за поефикасен транспорт и за отворање на границите во административна смисла.