SpaceX со рекорден лет: Џесика Воткинс стана првата црна жена командант на вселенска мисија

Четири астронаути пристигнаа на Меѓународната вселенска станица (ISS) во четвртокот, откако осумчасовниот експресен лет предводен од Џесика Воткинс постави американски рекорд за најбрзо патување до станицата и создаде уште еден историски момент — Воткинс стана првата црна жена која раководела со екипаж во орбитата.

SpaceX го лансираше леталото со командантката Воткинс и нејзиниот екипаж за потребите на НАСА по тринеделно одложување, поради санирање на дефект во системот за гориво на капсулата Dragon. Густите облаци целото утро се закануваа да го запреа одбројувањето, но небото се разведри доволно за безбедно полетување од Кејп Канаверал во 11:10 часот по локално време (15:10 GMT). По седум часа и 55 минути, капсулата Dragon „Grace“ се приклучи на пристаништето на ISS, со што беше поставен рекорд за најбрзо патување на американско вселенско летало до станицата.

На преносот во живо на телевизијата на НАСА, капсулата изгледаше како да се лизга нежно кон станицата додека двете летала се движеа низ вселената со брзина од околу 28.100 километри на час. Новите пристигнати членови — Американците Воткинс и Лук Дилejни, Канаѓанецот Џошуа Кутрик и Русинот Сергеј Тетерјатников — влегоа во вселенската станица низ херметички претвор и им се обратија на колегите на Земјата.

„Толку сме возбудени што сме тука. Ова е навистина посебно место“, изјави Воткинс на преносот во живо на НАСА. „Неверојатно е и донекаде иронично да се помисли дека патот до тука е толку краток, затоа што патувањето за да стигнеме дотука беше долго.

Воткинс е геолог која пред една деценија работела со роверот Curiosity на НАСА за истражување на Марс, а ова е нејзино второ патување до вселенската станица по долгиот престој во 2022 година. „Благодарам за неверојатното возење“, порача Воткинс по полетувањето.

Тие ќе ги заменат четворицата астронаути кои живеат во орбиталната лабораторија од февруари. Ова беше 13-ти екипаж што SpaceX го лансираше за НАСА, не сметајќи го тест-летот во 2020 година. Ознаката Crew-13 на мисијата им оддава почит на Apollo 13, ризичната мисија до Месечината од 1970 година која заврши со безбедно враќање на астронаутите. Воткинс и нејзиниот екипаж до платформата за полетување се возеа во црни возила Tesla со таблички на кои пишуваше „Lucky 13“, а со себе понесоа и мал плетен златен змеј по име Лаки со детелина со четири листа околу вратот.