SpaceX се подготвува за прв орбитален лет на Starship, со 26 нови сателити Starlink V3

Американската вселенска и одбранбена компанија SpaceX, во сопственост на Илон Маск, планира во понеделник рано наутро да ја лансира својата огромна ракета Starship, со цел вселенското летало за првпат да стигне до орбита. Според податоците објавени на интернет-страницата на компанијата, прозорецот за лансирање трае 75 минути и започнува во 8:15 часот по источно американско време, односно во 7:15 часот по локално време, од компаниското гратче Старбејс во сојузната држава Тексас.

Федералната управа за воздухопловство на САД (FAA) со е-пошта потврдила на CNBC дека на 26 септември издала „лиценцна дозвола за лансирање и операции за повторно влегување на SpaceX Starship Super Heavy, лет 14“. Со овој 14-ти тест-лет на Starship, компанијата планира и да распореди 26 од своите најнови сателити Starlink V3.

Starship е од клучно значење за плановите за експанзија на SpaceX. Компанијата смета на гигантската ракета за да го зголеми својот бизнис со Starlink, односно сегментот за поврзување, кој заклучно со второто тримесечје беше најголемиот и единствениот профитабилен дел од работењето. SpaceX денес управува со околу 11.000 активни сателити во орбитата, наспроти приближно 650 кај конкурентската Eutelsat OneWeb.

На разговорот со инвеститорите во август, Маск изјави дека „не е исклучено во одреден момент Starlink да обезбедува мнозинство од светскиот интернет, барем во земјите каде што имаме дозвола да работиме, а тоа е огромното мнозинство земји“. SpaceX излезе на берза во јуни, со најголемото IPO во историјата, и сега вреди околу 2 трилиони долари.

Компанијата ја дизајнираше ракетата Starship Super Heavy и нејзиниот засилувач целосно повеќекратно употребливи, со цел да подигнуваат повеќе товар за помал трошок во орбитата од било кое претходно вселенско летало. Ниту еден од 13-те претходни тест-летови не беше предвиден да стигне до орбита, но со 14-тиот лет SpaceX се надева дека Starship ќе ја обиколи планетата. Компанијата го подготвува Starship за голем тест-лет на НАСА следната година и има намера ракетата да ги врати американските астронаути на површината на Месечината.

Оперативната директорка на SpaceX, Гвин Шотвел, на самитот All-In претходно овој месец изјави дека компанијата планира да го искористи Starship и за поставување „суперкомпјутери во вселената“, лансирајќи „сателити за вештачка интелигенција“ во орбитата во 2027 година. Новите сателити V3, произведени во постројката на SpaceX во Редмонд, Вашингтон, се опремени со соларни панели што генерираат двојно повеќе енергија од претходните генерации. Тие се и поголеми и дизајнирани да бидат помоќни, пренесувајќи податоци побрзо од поранешните верзии до претплатниците на Starlink.