Скопје домаќин на меѓурегионален состанок на главните преговарачи за европска интеграција

Во Скопје денес се одржува Меѓурегионален состанок на главните преговарачи и високите претставници одговорни за европска интеграција, на кој домаќин е првиот заменик-претседател на Владата и министер за европски прашања, Беким Сали. Состанокот ги обединува претставниците од Западен Балкан, Украина, Молдавија и Грузија, како и претставници на Европската Унија и меѓународните партнери, со цел зајакнување на размената на искуства и практичната соработка меѓу институциите што го водат процесот на европска интеграција.

Во фокусот на дискусиите се иднината на проширувањето на Европската Унија, следната Повеќегодишна финансиска рамка и забрзувањето на усогласувањето со законодавството на ЕУ преку поефикасна соработка меѓу владите и парламентите. Во својата порака до учесниците, министерот Сали нагласува дека проширувањето претставува стратешка инвестиција во безбедноста, стабилноста и просперитетот на Европа, истакнувајќи дека посветеноста на реформите треба да биде проследена со веродостоен и предвидлив пристапен процес, во кој напредокот се оценува врз основа на заслуги.

Посебно внимание на состанокот се посветува на постепената интеграција и на можностите граѓаните и бизнисите да ги почувствуваат придобивките од приближувањето кон Европската Унија уште пред самото членство. Во таа насока, следната Повеќегодишна финансиска рамка се оценува како значајна можност за поддршка на реформите, зајакнување на институциите и економската конвергенција на земјите од регионот и пошироко.

Дискусиите на состанокот ја опфаќаат и улогата на парламентите во процесот на европска интеграција, потребата од рана координација при подготовката на законодавството и значењето на парламентарниот надзор за квалитетот и спроведувањето на реформите. Преку ваквата размена, учесниците имаат цел да утврдат области за понатамошна меѓурегионална соработка и да ги зајакнат практичните механизми за усогласување со европските стандарди.

Министерот Сали изразува благодарност до сите учесници и партнери за учеството и придонесот во организацијата на состанокот, со посебна благодарност до Амбасадата на Сојузна Република Германија и ГИЗ за поддршката во организирањето на настанот и за континуираната поддршка на европскиот пат на земјата.

Состанокот во Скопје претставува продолжување на напорите за продлабочена соработка меѓу земјите што го делат истиот пат кон европското семејство, при што се потврдува заедничката определба за реформи, стабилност и економски напредок во рамките на процесот на проширување на Европската Унија.