Синдикатите бараат плата по работен час, Владата вели дека прво треба анализи

Идејата вработените да се плаќаат по работен час, која ја иницираше Сојузот на стопански комори, наиде на поддршка кај Конфедерацијата на слободни синдикати (КСС). Од синдикатот сметаат дека е време да се смени методологијата за пресметка на платите, додека Владата порачува дека е отворена за дијалог, но инсистира прво да се направат анализи пред каква било одлука.

Претседателот на Конфедерацијата на слободни синдикати, Благоја Ралповски, на денешната конференција за минималната плата објасни зошто сметаат дека постојниот систем треба да се менува. Според него, основната причина е тоа што секој месец има различен број работни денови, поради што работниците со иста месечна плата всушност работат различен број денови. Ралповски наведе пример со февруари, кога има 20 работни дена, и јули, кога има 23, што значи дека работниците во јули работат три дена повеќе отколку во февруари.

„Време е за промена на методологијата за минималната плата и претварање на минималната плата во минимален работен час, од причина што секој месец имаме различен број на работни денови. Ако земеме февруари со 20 и јули со 23, знаеме дека работниците работат три дена повеќе во јули. Нашата цел е со ваквото претварање на минималната плата од минимална плата во работен час, да почнат по вертикала да растат сите плати, не само минималната, туку сите плати, не само во јавниот сектор, туку и сите плати во приватниот сектор“, изјави Ралповски.

Од КСС засега не дадоа конкретен одговор на прашањето дали се согласуваат саатнината да остане 150 денари или е потребно нејзино покачување. Синдикатот денеска организираше конференција посветена на минималната плата, на која се разговараше за можните измени во методологијата.

Заменик-министерот за економија и труд Марјан Ристески нагласи дека какво и решение да се донесе, тоа треба да произлезе од конструктивен дијалог со сите социјални партнери. Според него, решенијата не смеат да бидат политичка одлука што би предизвикала потрес во економијата, бидејќи, како што рече, вакви примери имало многу во минатото, а последицата била создавање на понезадоволни работници, плати со пониска куповна моќ и намален животен стандард.

„Сите решенија не треба да бидат политичка одлука што би направила потрес во економијата, а индиректно преку потресите од економијата, бидејќи имавме многу такви примери во минатото, се создаваат и понезадоволни работници и плати со пониска куповна моќ и намален животен стандард. Затоа сите решенија треба да бидат добро анализирани, да се види во новите методологии кои се позитивните, а кои се негативните страни, што би добиле работниците со таквите нови методологии, колку би пораснале платите, а од друга страна колку би направиле помал потрес на и онака крвката економија во Македонија“, рече Ристески.

Заменик-министерот потврди дека ваквиот начин на плаќање по работен час постои во неколку поразвиени држави, но нагласи дека сепак треба да се направат детални анализи за да се види како тоа ќе се одрази врз целиот сектор. Тој посочи и дека плаќањето по саатнина значи директни промени во Законот за работни односи, кој и сега е во процедура за измена, што би значело и целокупна промена на системот за пресметка на платите.

Расправата за преминување од месечна минимална плата кон плата по работен час доаѓа во момент кога се подготвуваат измени на Законот за работни односи. Двете страни — синдикатите и Владата — се согласуваат дека промената бара темелна анализа, но се разликуваат во акцентот: синдикатите сметаат дека е време за промена на методологијата, додека Владата инсистира дека секое решение мора да биде добро проучено и договорено со сите социјални партнери, за да не се наруши стабилноста на економијата и животниот стандард на работниците.