Секој четврти млад Европеец живее во пренаселено живеалиште, покажуваат податоците на Евростат

Во 2025 година, 26,9 отсто од младите луѓе на возраст од 15 до 29 години во Европската Унија живееле во пренаселени домаќинства. Оваа стапка е за 10,1 процентен поен повисока од онаа на вкупното население, каде што изнесува 16,8 отсто, соопшти Евростат.

Пренаселеноста кај младите не е еднаква за сите возрасни групи — таа се намалува со годините. Највисока е кај најмладите, на возраст од 15 до 19 години, каде што изнесува 30,1 отсто. Кај лицата на возраст од 20 до 24 години стапката е 28,7 отсто, додека кај младите на возраст од 25 до 29 години паѓа на 21,8 отсто.

Разликите меѓу земјите членки се значителни.

На спротивниот крај од скалата се наоѓаат Кипар со 3,5 отсто, Ирска со 7,4 отсто и Малта со 7,7 отсто.

Во три земји од ЕУ јазот меѓу младите и вкупното население е најмалку 20 процентни поени. Во Бугарија стапката кај младите изнесува 52,8 отсто наспроти 32,5 отсто кај вкупното население, во Грција 48,4 отсто наспроти 28,3 отсто, а во Романија 60,4 отсто наспроти 40,4 отсто.

Според методолошката забелешка на Евростат, едно лице се смета дека живее во пренаселено домаќинство ако домаќинството не располага со најмалку следниот број простории: една просторија за домаќинството, една просторија за секој пар во домаќинството, една просторија за секое самостојно лице на возраст од 18 или повеќе години, една просторија за секој пар самостојни лица од ист пол на возраст од 12 до 17 години, една просторија за секое самостојно лице на возраст од 12 до 17 години кое не е опфатено во претходната категорија, како и една просторија за секој пар деца под 12 години.