СДСМ: Земјоделците плаќаат повеќе, а добиваат помалку, додека власта троши на дата-центри и антимон

Опозициската СДСМ реагираше на најновите податоци на Државниот завод за статистика, според кои трошоците за земјоделско производство во август се зголемени за 6,8 проценти, додека цените што ги добиваат производителите се намалени за дополнителни 2,2 проценти. Од партијата оценуваат дека ваквиот јаз меѓу трошоците и откупните цени директно го погодува земјоделецот, кој, како што велат, плаќа повеќе, а не добива ништо.

Според соопштението на СДСМ, најголем пораст е забележан кај трошоците за гориво и енергија, кои се зголемени за 15,8 проценти, потоа кај машините со раст од 13,4 проценти и кај транспортната опрема со 19,6 проценти. Од друга страна, цените на зеленчукот се намалени за 6,4 проценти, на овошјето и грозјето за 7,2 проценти, а на производите од животинско потекло за 7,7 проценти. Од партијата сликовито го опишуваат овој спротивставен тренд: нивата поскапе, откупот поевтини, а во продавница храната не падна како на нива, туку се покачи, при што разликата ја голта синџирот меѓу производството и полицата.

Од СДСМ потсетуваат дека претседателот на партијата, Венко Филипче, уште пред месеци предупредувал дека погрешната политика и намалувањето на субвенциите, скратени за околу 40 милиони евра, ќе го донесат токму овој резултат. Како конкретни последици од ваквата политика тие ги наведуваат укинувањето на авансната исплата, доцнењето на зелената нафта и покачувањето на прагот за помош. Како илустрација за падот на откупните цени, од партијата наведуваат дека пиперката и грозјето се откупуваат по понижувачки цени, а зелката од 25 до 30 денари паднала на 6 до 8 денари.

Во соопштението се тврди и дека европските пари биле замрзнати откако, како што велат од СДСМ, актуелната власт била фатена како краде од фондовите, поради што задругите останале без поддршка. Од опозицијата наведуваат и дека Владата располага со 5,53 милиони евра за Гета и 1,6 милиони за бизниси, додека, како што тврдат, има и авион за потребите на премиерот Христијан Мицкоски, како и планови за дата-центар и антимон заради провизија. За оние што, како што велат, ја ранат државата, според СДСМ, остануваат само статистиката и молкот.

Од партијата порачуваат дека ВМРО-ДПМНЕ не води земјоделство, туку, како што се изразуваат, води плен. Тие потсетуваат дека горивото било пуштено да поскапи до плафон, по што власта излегла со половина мерка — само дел од ДДВ и тоа доцна, додека акцизата останала непроменета. Од СДСМ велат дека уште на самиот почеток барале укинување на акцизата, намалување на ДДВ на 5 отсто за енергенсите и минимална помош од 600 евра за земјоделците, но, како што тврдат, нивните предлози не биле прифатени.

На крајот од соопштението, СДСМ порачува дека е на страната на земјоделците и дека се залага за редовна субвенција, авансна исплата, зелена нафта на време, фер откуп и помош што стигнува навреме до земјоделците, но и до малите, а не само до големите откупувачи. Без таква поддршка, предупредуваат од партијата, оваа есен нема да има берба ниту сеидба, туку, како што велат, пресметка врз грбот на оние што произведуваат храна.