СДСМ: Три недели нема ниту еден функционален компјутерски томограф во Клинички центар, бараат итен рок и одговорност

СДСМ побара одговорност поради тоа што, како што тврдат од партијата, три недели не работи ниту еден компјутерски томограф во Клиничкиот центар. Оваа информација ја соопшти Елена Радеска, член на партиската Комисија за здравство, која најави дека партијата инсистира сите томографи веднаш да бидат ставени во функција и да се утврди кој е одговорен за настанатата состојба.

Според Радеска, пациентите цели три недели чекаат и се оставени сами на себе, а болеста не чека. Таа оцени дека станува збор за хаос и тотален распад на јавното здравство, за што, како што рече, одговорност носи министерот за здравство Клековски. „Зад секој одложен преглед стои човек што чека дијагноза. Семејство што стравува. Пациент што не знае кога ќе почне да се лекува“, изјави Радеска и побара Клековски веднаш да излезе пред пациентите и да одговори зошто три недели нема решение, каде се упатуваат итните случаи, колку прегледи се одложени и како е можно да не се лекуваат пациентите.

Од СДСМ порачуваат дека здравството и клиниките не смеат да бидат партиски плен и дека за здравјето на луѓето се работи, а не само за криминални тендери. „Не може за тендери да има, а за томографи да нема пари“, рече Радеска, нагласувајќи дека граѓаните плаќаат здравствено осигурување за да добијат преглед и лекување, а не затворени врати и префрлање на одговорноста.

Таа повлече паралела со случајот во Гостивар, каде, како што потсети, 5.000 луѓе беа отруени, а одговорност нема. Според неа, граѓаните со најскапото нешто ја плаќаат цената за катастрофалните политики на власта, која ја оцени како арамиска и криминална.

СДСМ бара веднаш да се стават во функција сите томографи за да може да продолжат прегледите, како и утврдување на точен рок за нивно пуштање во работа. Партијата бара и утврдување на одговорност, од министерот Клековски па се до раководството на Клиничкиот центар.

Од партијата потенцираа дека не смее да се дозволи здравјето на граѓаните да биде заложник на партиски интереси и тендерски набавки, туку дека приоритет мора да биде непречено функционирање на дијагностиката и лекувањето на пациентите.