СДСМ на 11 Октомври: Антифашизмот е обврска, а не споменик

Опозициската СДСМ го одбележа 11 Октомври, Денот на народното востание, со порака дека антифашизмот не е само историски спомен туку секојдневна обврска. Од партијата потсетија дека пред 85 години партизаните излегоа на теренот за слободна држава, за слобода и за достоинство на човекот, и тоа против фашизмот.

„Пред 85 години партизаните излегоа за слободна држава. За слобода. За достоинство на човекот. Против фашизмот“, велат од СДСМ, додавајќи дека тоа не било излегување за поделба, ниту за понижување на народот.

Од партијата остро реагираа на речникот што, како што велат, не припаѓа на традицијата на Народноослободителната борба. „Не за да го викаат талог, мочуриште, медиокритети, глодари. Тој речник не е од 11 Октомври и вредностите на НОБ. Тој речник е од друга традиција“, порачаа од СДСМ.

Според партијата, таа секогаш била на вистинската страна на историјата, а антифашизмот го дефинираат како обврска, а не како споменик. „Антифашизмот не е споменик туку обврска. Обврска да се живее во мир и слога, не во закани и раздор“, велат од СДСМ.

Од партијата наведуваат неколку конкретни обврски што произлегуваат од таа традиција. Тие сметаат дека законот мора да важи за сите, а не само за оние што немаат кабинет, дека зборот мора да биде слободен, а медиумот да не биде во мрак, како и дека државата треба да работи за себе, а не за интерес на друга земја.

Во пораката се нагласува и европската перспектива на земјата. Од СДСМ велат дека иднината е во Европа, во подобар стандард, во плата од која се живее достоинствено и добро, во пензија што не се крои секој месец, во чиста и здрава вода, како и во млади што остануваат дома.

Според партијата, младите не треба да остануваат затоа што им е речено да бидат патриоти, туку затоа што имаат работа, дом и иднина. Тие додаваат дека патриотизмот се мери со тоа како се живее денес и што им се остава на децата утре.

Од СДСМ изразуваат очекување дека граѓаните нема да мораат да земаат бугарски пасоши, ниту да глумат патриоти заради личен интерес, туку вистински да ја сакаат и почитуваат својата татковина. Притоа предупредуваат дека лажниот патриотизам не смее да биде пат кон власт.

Во соопштението се наведува и ставот на партијата за позицијата на државата во меѓународните односи. „Македонија не е депонија за туѓ проект. Не е рудник за туѓа муниција. Не е хардвер за туѓа дигитализација. Не е ходник за туѓа агенда. Не е каса за провизија. Македонија е заедничка татковина“, велат од СДСМ.

Од партијата објаснуваат дека се работи за сопствената татковина и дека се живее со соседите, а доколку е потребно и се преговара, но не се провоцира. Според нив, предците се бореле да имаме држава, а денешната генерација води битка за иднината.

Таа битка, како што велат од СДСМ, е против корупцијата и криминалот, за подобар живот и повисоки плати, за слобода на говор и медиуми, како и за нормален и достоинствен живот. Тие додаваат дека се работи за битка да живее чесниот свет, а не банда, и за заедничка битка за Европа.

Од партијата порачуваат дека СДСМ е наследник на таа борба и дека ќе продолжи со демократски средства, со вистина и со глас на народот. „Државата ќе ја вратиме во служба на народот. Иднината не е во поделбите“, заклучуваат од СДСМ во пораката по повод 11 Октомври.