СДСМ: Мицкоски ветува илјада евра просечна плата, а минималната од 600 евра ја нема

Опозициската СДСМ остро ја критикуваше најавата на премиерот Христијан Мицкоски за просечна плата од 1.000 евра, оценувајќи дека станува збор за уште една нереална ветување, додека минималната плата од 600 евра не е обезбедена. Од партијата велат дека „на бајките на арамијата им нема крај“ и дека сметката за ваквите најави на крајот ја плаќа народот.

„Арамијата излезе со нова бројка. Просек од илјада евра плата. Како пензиите, исто, што велеше дека се 16 пати зголемени. Како третата економија во Европа. Како Гета што чинел нула. Минималната плата од 600 евра ја одбија во Собрание. СДСМ го поднесе Законот. ВМРО-ОКГ не гласаше. Левица не беше во сала. ЗНАМ не даде глас“, се наведува во соопштението на СДСМ.

Од партијата потсетуваат дека предложениот закон за минимална плата од 600 евра не добил поддршка во собраниската сала, при што ВМРО-ОКГ не гласала за предлогот, Левица не присуствувала на седницата, а ЗНАМ не дала свој глас. Според СДСМ, „сателитите не застанаа на страната на работникот“, со што директно ја обвинија владејачката коалиција и нејзините партнери дека не покажале грижа за работниците.

СДСМ тврди дека две минимални плати не ја покриваат ниту намалената владина кошничка, а со вклучена кирија, синдикалната кошничка надминува 90.000 денари. Од партијата велат дека горивото е „до плафон“, а луѓето немаат ни за леб, додека власта „црта илјада“ евра просечна плата.

„Просек од илјада евра плата не се прави со говор. Се прави со дела, со покачување на минимална плата, со намалување на синдикална кошница, со мерките што СДСМ ги предложи уште на почетокот на кризата. Ништо не беше прифатено. Цените отидоа до плафон. Сега доаѓа бајка. Нема 600. Има илјада. Нема плата. Има цртање. На бајките на арамијата им нема крај. Сметката ја плаќа народот“, се вели во соопштението.

Од СДСМ нагласуваат дека нивните предлог-мерки за справување со кризата, меѓу кои покачување на минималната плата и намалување на синдикалната кошничка, не биле прифатени од власта, а цените продолжуваат да растат. Според партијата, најавата за просечна плата од 1.000 евра е само продолжување на серијата неисполнети ветувања, слични на претходните тврдења за 16 пати зголемени пензии, за трета економија во Европа и за Гета како проект што чинел нула.

Оваа реакција на СДСМ доаѓа во момент кога економската состојба и стандардот на граѓаните се централна тема во јавниот дискурс, а опозицијата инсистира дека реалните мерки, а не ветувањата, се единствениот начин за подобрување на животниот стандард.