СДСМ: Мицкоски и Клековски ги кријат извештаите за квалитетот на водата, угина и рибата во Треска

Опозициската СДСМ денеска го обвини премиерот Христијан Мицкоски и министерот за животна средина и просторно планирање, дека десет недели по масовното труење со вода во Гостивар, јавноста сè уште нема потпишан јавен извештај за квалитетот на водата што го разбира секој граѓанин. Од партијата тврдат дека наместо лабораториски анализи, граѓаните добиваат само уверување од премиерот дека водата е чиста, што, според нив, не претставува никаков доказ.

Според соопштението на СДСМ, во Гостивар илјадници граѓани се отруја, а околу пет илјади лица побарале лекарска помош. Партијата потсетува дека случајот бил проследен со хиперхлорирање на водата, појава на бактерии, воведување забрана за употреба и испорака на техничка вода што не е безбедна за пиење. И покрај сето тоа, како што велат од опозицијата, до денес нема официјален извештај потпишан од лабораторија.

„Зборот на шефот на бандата не е анализа“, порачаа од СДСМ, оценувајќи дека водата во државата се третира како државна тајна. Тие потсетија дека во моментот угинува рибата во реката Треска и дека се бараат итни анализи, но дека истото прашање како во Гостивар се поставува и за Лепенец и за Вардар — каде се резултатите од испитувањата.

Од партијата го споменаа и Орце Ѓорѓиевски, кого го опишаа како „човекот-дрон“ на ВМРО-ОКГ, наведувајќи дека тој водата ја проверувал од воздух, но дека конкретен резултат од таквата проверка нема. Според СДСМ, во повеќе од педесет места низ Македонија нема јавно достапни извештаи за квалитетот на водата, а одговорноста за нивното криење ја носат Мицкоски и Клековски.

Како причина за криењето на извештаите, од опозицијата наведуваат дека водата „не се слика добро кога е валкана“ и дека труењето има име, презиме, функција и одговорност. Тие тврдат дека ако народот ги прочита извештаите, ќе пропадне она што го нарекуваат бајка за тоа дека нема криминал и дека се живее подобро.

СДСМ во соопштението го спомена и неодамнешниот концерт на Дејвид Гета, за кој тврдат дека бил платен 5,53 милиони евра од народни пари преку Лотарија. Според партијата, ваквите настани служат како анестезија со цел граѓаните да заборават што пијат, но дека тоа нема да се случи бидејќи водата не е естрада и не е публика од 200.000 луѓе што ја нема.

„Водата е прва работа што влегува во куќата. Кога ќе ја отруеш, си ја отрул државата“, порачаа од СДСМ, опишувајќи го управувањето на ВМРО-ОКГ со сликата за камера на бина, дрон над река и извештај во фиока.

Од партијата бараат веднаш, а не утре, целосни извештаи за Гостивар, за Треска, за Лепенец, за Вардар и за секое место каде што, како што велат, водата се крие како државна тајна. Според нив, без потпис на лабораторија нема чиста вода, туку само, како што се изразија, банда што се плаши од сопствената чешма.

„Кој крие вода, крие злосторство. А кој после тоа организира концерт, не слави независност. Слави што народот сè уште нема документ во рака дека водата е чиста“, се наведува во соопштението на СДСМ.