СДСМ бара Мицкоски да открие каде завршиле над 5 милиони евра потрошени за прославата на независноста

СДСМ побара премиерот Христијан Мицкоски јавно да објави каде завршиле над 5 милиони евра народни пари, откако, како што велат од партијата, било признато дека трошокот за прославата на независноста не изнесувал „0 денари“ како што претходно се тврдеше.

„Уште еднаш се потврди дека арамијата Мицкоски штом отвори уста лаже. Вчера, дури и неговата портпаролка на Владата го демантираше на прес конференција. Не се ‘0 денари‘ како што лажеше Мицкоски туку за прославата на независноста потрошени се над 5 милиони евра, народни пари“, велат од СДСМ во соопштението.

Од партијата потсетуваат дека претседателот Венко Филипче и СДСМ уште од самиот почеток го говореле токму ова. Според нив, преку АД Државна Лотарија, која е 100 отсто државна компанија, потрошени се над 5 милиони евра, а никој не знае каде и за што.

„Откако призна дека не се ‘0 денари‘ туку над 5 милиони евра, Мицкоски јавно да објави каде завршија парите на граѓаните. Кои компании добиле милиони евра народни пари, врз основа на кои критериуми? Колку милиони евра се потрошени за провизии и проценти? Ова е една голема проневера на пари, арамиски концепт на владеење на Мицкоски и неговата Организирана криминална група. Се лажат граѓаните дека чинело ‘0 денари‘, се кријат информации, се манипулира додека милионски суми завршиле во нечии џебови. Бараме Мицкоски веднаш да ги објави сите исплати, граѓаните коишто платија 5 милиони евра нивни пари да знаат кој, колку пари добил и за што“, се наведува во соопштението на СДСМ.

Од партијата инсистираат на целосна транспарентност за тоа како се трошени средствата, со оглед на тоа што, како што тврдат, станува збор за пари на граѓаните собрани преку државна компанија. Според СДСМ, граѓаните имаат право да знаат кои фирми добиле милионски суми, по кои критериуми биле избрани и колку од вкупната сума завршиле како провизии и проценти.

СДСМ оценува дека случајот претставува сериозно прашање за јавните финансии и за начинот на кој се управува со државните ресурси, наведувајќи дека станува збор за милионски суми кои, како што велат, завршиле на непознати адреси. Од партијата повторуваат дека бараат итна јавна објава на сите исплати поврзани со прославата на независноста, со цел граѓаните да добијат одговор каде отишле парите што ги платиле.