СДСМ бара јавни одговори за дата-центрите: кој инвестира, колку струја и вода троши проектот

СДСМ преку соопштение до јавноста обвинува дека премиерот Христијан Мицкоски продолжува со проектот за центри за податоци, без јавноста да добие одговори за инвеститорот, потрошувачката на електрична енергија и вода и условите под кои би се реализирал проектот. Од партијата велат дека Мицкоски повторно посочил оти процесот е „неповратен“, но прашуваат кој инвестира, колку електрична енергија ќе се троши, од каде ќе се обезбедува водата и каде ќе завршува загреаната вода од системите за ладење.

Според соопштението на СДСМ, компанија тврди оти има обезбедено 100 мегавати електрична енергија и директен пристап до Вардар, како и дека Владата дала зелено светло за проектот. Од партијата бараат да се соопшти кој е инвеститорот и дали електричната енергија ќе биде домашна или увозна. Во соопштението се поставува и прашањето од кои водни ресурси би се обезбедувала потребната вода – Вардар, Лепенец, Треска или водоснабдителниот систем во Гостивар – како и каде би се испуштала загреаната вода.

СДСМ предупредува дека големите центри за податоци трошат огромни количества електрична енергија и вода и се повикува на примери од Ирска, Амстердам, Сингапур, Њујорк, Малезија и Чиле, каде што, како што наведува партијата, се воведени ограничувања или преиспитувања на вакви проекти поради влијанието врз енергетските и водните ресурси. Од СДСМ велат дека не се против дигитализацијата, но оценуваат дека центарот за податоци не е дигитализација, туку инфраструктура за туѓи дигитални услуги.

„СДСМ е против кражба облечена во сервер“, се наведува во партиското соопштение, во кое се бараат јавни информации за инвеститорот, договорот, потребните мегавати и количината вода. Од партијата обвинуваат дека граѓаните би ги сноселе трошоците преку сметките за електрична енергија и водоснабдување, додека условите и евентуалните финансиски придобивки од проектот остануваат непознати.

Според СДСМ, клучното прашање останува кој стои зад инвестицијата и под какви услови државата го отстапува пристапот до енергетските и водните ресурси, наместо тие одговори да бидат достапни до јавноста пред проектот да добие зелено светло.