Самсунг со рекорден квартален профит од 80 милијарди долари благодарение на побарувачката за чипови за вештачка интелигенција

Самсунг Електроникс соопшти дека очекува деветкратно зголемување на кварталниот профит во споредба со истиот период лани, поттикнато од растечката побарувачка за мемориски чипови што се користат во центрите за податоци за вештачка интелигенција. Технолошкиот гигант проценува дека оперативниот профит за трите месеци до крајот на септември ќе достигне 107,4 трилиони вони, што е еквивалент на 61 милијарда фунти или 80 милијарди долари. Ова е четврти квартал по ред со рекордна заработка за компанијата.

Самсунг е еден од најголемите производители на мемориски чипови во светот, заедно со домашниот конкурент СК Хајникс и американскиот Мајкрон. Овие компании произведуваат чипови од клучно значење за фирмите што се занимаваат со вештачка интелигенција, како што е Нвидија. Покрај производството на чипови, Самсунг е и еден од најголемите светски производители на паметни телефони, вклучително моделите Галакси Фолд и С26.

Компанијата очекува дополнителен поттик и од најновите преклопни уреди што ги претстави во август. Целосните резултати за третиот квартал ќе бидат објавени на крајот на октомври. Големите јужнокорејски компании вообичаено објавуваат прегледи на своите приходи за да ги информираат инвеститорите пред подеталните извештаи.

Глобалната побарувачка за компјутерски чипови што ја поттикнуваат развојот на вештачката интелигенција е огромна, што помогна да се зголемат приходите и акциите на производителите поврзани со оваа технологија. Растот на побарувачката во последниве години доведе до недостиг на полупроводници на глобално ниво, што ги зголеми продажбите за компании како Самсунг.

Пазарната вредност на СК Хајникс и Самсунг годинава ја надмина границата од еден трилион долари, односно 757 милијарди фунти. Сепак, нивните акции оттогаш паднаа поради загриженоста дека технолошките акции се преценети.