САД бараат заплена на 61 милион долари во криптовалути — наводно приходи од иранска нафта
Американските власти поднесоа граѓанска тужба за заплена на криптовалути во вредност од 61 милион долари, за кои тврдат дека потекнуваат од продажба на иранска сурова нафта и нафтени деривати на црниот пазар, пренесува CNBC. Тужбата ја поднесе Канцеларијата на американскиот државен обвинител за Јужниот округ на Њујорк.
Според наводите во тужбата, Техеран користел мрежа на криптовалутни актери во Кина и на други места за да исперат повеќе од 1,5 милијарда долари нелегални нафтени пари, наменети за иранската војска и за Исламската револуционерна гарда. Средствата, како што се тврди, биле наменети за финансирање на иранската влада и воените структури.
Заменникот на американскиот државен обвинител, Шон С. Бакли, изјави дека САД запленуваат и бараат конфискација на повеќе од 61 милион долари од парите на иранската влада, кои во спротивно би можеле да поттикнат непријателски воени дејства и терористички напади против САД и нивните сојузници.
Во тужбата се именувани две кинески компании — Blessed Trust и Hexa Whale — за кои се наведува дека користеле сметки за тргување на криптоберзата Binance за да го исперат приходот од црнопазарската продажба на иранска нафта и да ги пренасочат нелегалните средства кон иранската влада, нејзините агенти или прокси-групи. Според документот, Blessed Trust се претставува како фирма за управување со богатство или чување виртуелни средства, но примала и пренесувала средства и нудела услуги за замена на фиатни пари во криптовалути, вклучително преку американски издавачи на криптовалути. Hexa Whale, пак, нудела слични услуги, работејќи со Blessed Trust и нејзините поврзани субјекти. Двете компании, како што се наведува, користеле и американскиот финансиски систем за испраќање или примање десетици милиони долари. CNBC не успеа да добие коментар од Hexa Whale и Blessed Trust.
Портпарол на Binance изјави дека берзата има нулта толеранција кон кршење на санкции или нелегална активност и дека не дозволила никакви трансакции со санкционирани лица. Тој додаде дека Binance ќе продолжи да соработува со органите за спроведување на законот и дека секогаш кога ќе се идентификува ризик од санкции или нелегално финансирање, ќе истражува, ограничува или замрзнува сметки, ќе ги отстранува корисниците и ќе известува надлежните органи.
Според тужбата, Tether Ltd. ќе ги „изгори" криптовалутните токени што се наоѓаат на целните адреси и ќе издаде замени токени со иста вредност, кои ќе бидат префрлени во притвор на американската влада. Tether не одговори веднаш на барањето за коментар.
Во април Вашингтон санкционираше една независна, таканаречена „чајник" рафинерија во Кина и предупреди финансиските институции дека може да се соочат со санкции доколку работат со кинески рафинерии што преработуваат иранска нафта. Според извештај на Reuters од 10 септември, Иран користел аранжман налик на бартер за да ги заобиколи санкциите за продажба на нафта и да купи стоки од Кина во вредност од милијарди долари. Кина е еден од најголемите купувачи на иранска нафта, со повеќе од 80 отсто од иранската испорачана нафта во 2025 година, односно просечно 1,4 милиони барели дневно.