САД бараат поблиска соработка со „Релајанс“ за рафинирање на западна нафта

Американскиот државен секретар Марко Рубио изјави дека САД сакаат поблиска соработка со индиската компанија „Релајанс Индастриз“ за рафинирање на енергија од „Западната хемисфера“. Во интервју за индиската телевизија „Нетворк 18“, која е во сопственост на „Релајанс“, Рубио рече дека таквата соработка е корисна и за Индија и за САД.

Рубио во средата ја посетува рафинеријата на „Релајанс“ во Џамнагар, во сојузната држава Гуџарат, која според изворот е најголемата и најсложена рафинерија на една локација во светот, со капацитет за преработка од 1,4 милиони барели сурова нафта дневно. Според податоците од крајот на септември, „Релајанс“ е најголемиот купувач на венецуелска сурова нафта надвор од САД.

Рубио оцени дека „извонредниот“ рафинериски капацитет на компанијата може да помогне на Индија да ги диверзифицира своите енергетски извори, навестувајќи можен поголем откуп на венецуелска нафта. Тој додаде дека Венецуела го зголемува енергетското производство и дека Индија има долга историја во преработката на таква нафта. Американскиот претседател Доналд Трамп, пак, ја притиска Индија да купува повеќе венецуелска нафта наместо руска, а државните нафтени компании купуваат опортунистички, додека „Релајанс“ е главниот купувач.

На прес-конференција во вторникот, Рубио го истакна капацитетот на „Релајанс“ за преработка на тешка сурова нафта и ја нарече Индија „рафинериска суперсила“, одговарајќи на прашање за улогата што Њу Делхи и неговите компании можат да ја имаат во задоволувањето на светската енергетска побарувачка. Според Прамет Пал Чаудхури од „Евроазија груп“, индиските и кинеските рафинерии добро се справуваат со тешка и среднотешка сурова нафта од Венецуела и Русија, а таков вид гориво е посоодветно за производство на дизел.

Посетата на Џамнагар доаѓа и во момент кога цените на дизелот во САД се зголемени, а претстојат меѓуизбори. Цените на дизелот, кои влијаат врз американските камионџии, земјоделци и превозници, се очекува да останат високи и во следната година. Инаку, „Релајанс“ годинава ги продлабочи врските со САД, откако во март Трамп објави дека Америка ќе изгради своја прва нова рафинерија за нафта по 50 години, со помош на инвестиција од компанијата на Мукеш Амбани. Чаудхури за CNBC изјави дека „Релајанс“ никогаш не објавила детали за таа инвестиција, што создава неизвесност околу договорот, а Рубио ќе се обиде да го „заклучи“ или да го одведе чекор понатаму.