Сè повеќе граѓани се вакцинираат против сезонски грип, вакцини има доволно за сите

Интересите за вакцинирање против сезонски грип во земјава растат, а од Министерството за здравство уверуваат дека вакцини има доволно за сите заинтересирани граѓани. Меѓу оние кои редовно се пријавуваат е и пензионерката Добрила, која по искуството со придобивките од вакцината сега секоја сезона аплицира за бесплатна доза.

Таа вели дека брзо добила термин и дека вакцинирањето го смета за најдобар начин да го заштити своето кревко здравје. Нејзиниот пример го потврдува трендот на зголемен интерес, кој лекарите го оценуваат како позитивен чекор кон намалување на здравствените компликации поврзани со грипот.

Доктор Кљусева потсетува дека за лицата во ризична група вакцината против сезонски грип е бесплатна и упатува на начинот на кој можат да се пријават. Според неа, навременото вакцинирање е клучно за заштита на најранливите категории граѓани.

Во меѓувреме, на одделот за педијатрија е забележан зголемен број амбулантски прегледи, но и на хоспитализирани деца. Овој податок укажува на зголемена циркулација на респираторни инфекции во овој период, поради што здравствените власти апелираат до граѓаните да бидат внимателни.

Покрај вакцинацијата, се препорачува и често проветрување на просториите, нивно соодветно затоплување, редовно миење на рацете, како и избегнување на метеж и контакт со лица кои кашлаат. Се советува и практикување на здрава исхрана, физичка активност и намалување на стресот како дополнителни мерки за заштита на здравјето.

Од Министерството за здравство апелираат до граѓаните коишто добиле термин за вакцинација, доколку не можат навремено да дојдат, да го откажат терминот, за тој да може да се додели на друг пријавен граѓанин. На тој начин, како што велат, се обезбедува ефикасно искористување на достапните вакцини и навремена заштита за што поголем број граѓани.