Рупијата се лизга кон 100 за долар и покрај интервенциите на RBI

Индиската рупија повторно е под притисок и покрај најновите мерки на централната банка, при што стратезите не ја исклучуваат можноста курсот да достигне 100 рупии за еден американски долар. По неколку дена на закрепнување од 96,79 рупии за долар до нивото од 95, валутата се соочува со очекувано слабеење кон крајот на годината и до средината на 2027 година, пренесува CNBC.

Резервната банка на Индија (RBI) во саботата објави мерки со кои се поскапуваат шпекулативните облози против рупијата и се ограничува повторното склучување на откажани девизни деривативни договори. Дополнително, отворен е посебен прозорец за задоволување на целокупните дневни потреби за долари на три државни нафтени маркетинг компании, со што оваа трговија се изолира од спот-пазарите. Според Хаna Лучникава-Шорш, раководителка за економија на Азија-Пацифик во S&P Global Market Intelligence, овие чекори ќе го забават слабеењето на рупијата, но не можат целосно да ги неутрализираат основните притисоци.

S&P Global Market Intelligence очекува рупијата да се тргува околу 97 за долар до крајот на 2026 година и 98 рупии до средината на 2027 година. Сингапурската Mizuho Securities, пак, предвидува слабеење до 98 рупии за долар кон крајот на 2026 и почетокот на следната година, изјави за CNBC Вишну Варатан, раководител за макро стратегија за Азија-Пацифик во фирмата. Гувернерот на RBI, Санџај Малхотра, во интервју за индискиот медиум Moneycontrol изјави дека централната банка е решена да стори сè што е потребно за да обезбеди уредно движење на девизниот пазар.

Мерките од саботата доаѓаат само неколку месеци откако RBI во јуни лансираше специјална шема за девизни депозити на нерезиденти (FCNR-B), која им понуди стимулации на Индијците во странство за девизни депозити во индиски банки. Иако ова ги зголеми девизните резерви за 105 милијарди долари, глобалните неповолни услови ја принудија централната банка на агресивна интервенција на спот-пазарите, според извештај на Nomura. Од затворањето на програмата на 30 август, рупијата падна за 1,9 отсто во однос на доларот, а интервенциите преку продажба на долари ги намалија девизните резерви за 51 милијарда долари заклучно со 2 октомври, соопшти Ambit Capital. Истиот извештај наведува дека покриеноста на увозот изнесува околу 6,2 месеци, најниско ниво од таканаречениот taper tantrum во САД во 2013 година.