Ривс: Брегзит нè направи посиромашни, послаби и помалку безбедни — иднината на Британија е во ЕУ

Поранешната министерка за финансии Рејчел Ривс изјави дека иднината на Британија треба повторно да биде во Европската Унија, оценувајќи дека Брегзит ја направил земјата „посиромашна, послаба и помалку безбедна“. Ова е нејзиното прво големо јавно обраќање откако ја напушти функцијата по доаѓањето на Енди Барнам на власт, пренесува The Guardian.

Во текст за Sunday Times, Ривс нагласи дека никој што работел со неа во Министерството за финансии не можел да се сомнева во нејзините проевропски убедувања. „Горда сум на напредокот што веќе го постигнавме во зајакнувањето на нашите односи со Европската Унија. Брегзит нè направи посиромашни, послаби и помалку безбедни“, напиша таа. Според неа, за идната врска со Европа треба да се води дебата, а таа ја поздрави лидерската улога на Барнам во соочувањето со ова прашање.

Ривс, која беше разрешена од функцијата министер за финансии од Барнам, оцени дека поддржувачите на враќањето во ЕУ имаат обврска да го аргументираат тоа, да покажат опипливи придобивки и правилно да ги испланираат следните чекори. Таа потсети и на своето предавање „Мejs“ од март годинава, во кое рече дека Брегзит „создаде длабока несигурност, подигна нови трговски бариери и ја остави Британија со дополнителна опасност — ризикот да остане заглавена меѓу моќни трговски блокови додека глобализацијата се повлекува“.

Тековниот фокус на британските преговори е самитот на ЕУ подоцна овој месец, на кој треба да се запечати договор за олеснување на некои трговски ограничувања и договор за мобилност на млади. Премиерот јасно изрази желба за долгорочен и стабилен однос со блокот. Барнам, пак, изјави дека верува оти треба да има „искрена дискусија“ за слободата на движење и дека враќањето во единствениот пазар би можело да се направи без нов референдум, доколку Лабуристите го вклучат тоа во својот манифест. Целосното повторно членство, според него, би барало ново гласање „за или против“.

На последната седница на владата, Барнам предупредил поединечните министри да не изнесуваат мислења за тоа како владата треба да пристапи кон Брегзит, но оценил дека договорот на конзервативците со Брисел бил поекстремен од она што беше ветено на референдумот во 2016 година. Ова доаѓа по извештаите дека некои министри, меѓу кои и министерката за внатрешни работи Шабана Махмуд, имаат загриженост за можноста за ревидиран договор и неговото влијание врз миграцијата. Барнам постави двoфазна стратегија за реформа на Брегзит: прво, промени во рамките на манифестот на Лабуристите од 2024 година, кој се обврза да остане надвор од царинската унија и единствениот пазар и да не ја враќа слободата на движење — процес што формално почнува со учеството на премиерот на европскиот самит. Сè позначајно би чекало по следните избори, за што Барнам рече дека сака дискусија.