Ристовски го пречека Рустемовски: бронзата од Софија му носи статус „Спортист од светска категорија“ и државна поддршка

Министерот за спорт Борко Ристовски денеска го пречека македонскиот боксер Ален Рустемовски и лично му честиташе за историскиот успех и освоениот бронзен медал на Европското сениорско првенство во Софија, Бугарија. Со овој резултат Македонија повторно има европски медал во сениорски бокс, прв пат по 2008 година, кога Вели Мумин освои бронза на Европското првенство во Ливерпул.

Рустемовски до полуфиналето во категоријата до 60 килограми стигна со три последователни победи, со што го обезбеди бронзениот медал за Македонија. Согласно Правилникот за категоризација на спортистите од Република Македонија, со освоениот бронзен медал на Европското првенство Рустемовски влегува во категоријата „Спортист од светска категорија“, со што се стекнува со право на паричен надомест од државата во висина од две просечни плати во период од четири години.

Покрај паричниот надомест, со трите победи и бронзениот медал на Европското првенство Рустемовски се стекнува и со право на највисокото Национално спортско признание што се доделува на македонските спортисти за врвни спортски остварувања по навршување на 40-годишна возраст.

Министерот Ристовски не го криеше задоволството од успехот на младиот боксер и истакна дека зад медалот стојат огромна работа, дисциплина и карактер. „Ален покажа дека Македонија има боксер за големата европска и светска сцена. Овој медал е резултат на огромна работа, дисциплина и карактер и претставува потврда дека младите македонски спортисти имаат квалитет за најголеми натпреварувања. Како Министерство за спорт, наша обврска е да стоиме зад нив, да ги препознаеме нивните резултати и да создадеме услови тие да продолжат да напредуваат. Ален заслужено добива нов статус како Спортист од светска категорија, а со него и конкретна државна поддршка. Му честитам за историскиот резултат и му посакувам уште поголеми успеси“, истакна министерот Ристовски.

Ова не е првпат Министерството за спорт да го препознае талентот на Рустемовски. Минатата година тој беше прогласен за најдобар млад спортист, признание кое, како што покажуваат резултатите, го оправда со новиот голем успех на европската сцена.

Бронзата од Софија е второ големо одличје за Рустемовски во период од неполн месец. Претходно тој освои бронзен медал и на Медитеранските игри во Таранто, Италија, со што потврди дека се наоѓа во одлична форма и дека континуирано напредува на меѓународната сцена.

Успехот во Бугарија има дополнителна тежина бидејќи станува збор за историски резултат за македонскиот бокс. Ворлд бокс е организација преку која се обезбедува учество на Олимписките игри, а со освоениот медал Рустемовски доби и 300 рејтинг поени. Токму тие поени го наметнуваат како сериозен кандидат за учество на Олимпијадата 2028 година во Лос Анџелес.

Со влегувањето во категоријата „Спортист од светска категорија“, Рустемовски добива стабилна државна поддршка во наредните четири години, што треба да му овозможи непречено да се подготвува за најголемите натпреварувања. Министерството за спорт останува посветено на поддршката на македонските спортисти, а случајот на Рустемовски е показател дека препознавањето на резултатите и создавањето услови за напредок можат да донесат врвни остварувања на европската и светската сцена.