Ripple и Robinhood со партнерство за проширување на дигиталниот долар RLUSD — 27.10.2026

Компанијата Ripple склучи договор со Robinhood со кој се проширува употребата на нејзиниот дигитален долар RLUSD, со што се зајакнуваат трговските и финансиските врски меѓу нивните институционални бизниси и се подобрува внатрешното управување со средствата на Robinhood, објави CNBC.

Договорот, исто така, придонесува кон амбицијата на Robinhood да стане глобална финансиска супер-апликација, која ги централизира финансиските животи на своите клиенти додека ја проширува основната инфраструктура што може да им служи и на малите, и на институционалните клиенти. „Практичната употреба е она што ги движи стабилните криптовалути напред. Работејќи со Ripple, Bitstamp и Robinhood ќе имаат пристап до RLUSD за институционално порамнување, Ripple Treasury за нашите операции и Ripple Prime за финансирање“, изјави Јохан Кербрат, генерален директор на Robinhood Crypto, во соопштение споделено со CNBC. „Така изгледа поврзан, глобален финансиски систем“, додаде тој.

Стабилните криптовалути долго време се основна алатка во крипто светот, бидејќи им овозможуваат на трговците да префрлаат пари меѓу берзите, да купуваат и продаваат крипто средства и да ги чуваат средствата меѓу трговиите без конверзија во традиционална валута. Како што крипто индустријата се развива надвор од тргувањето и пазарите се движат кон ликвидност достапна 24/7, стабилните криптовалути стануваат суштинска финансиска инфраструктура поради способноста за речиси моментално порамнување и пренос на вредност деноминирана во долари во секое време, независно од работното време на традиционалните банки.

„Стабилните криптовалути еволуираа од крипто трговска алатка во критичен дел од финансиската инфраструктура“, изјави Моника Лонг, претседателка на Ripple, за CNBC. „Најјасниот доказ за тоа е каде се вградуваат денес — од корпоративни плаќања до капитални пазари. Нашето партнерство со Robinhood го одразува тој развој“, рече таа, додавајќи дека станува збор за многу повеќе од тргување и за фундаментална промена во тоа како парите се движат и се управуваат.

RLUSD ќе биде достапен и на трговската платформа на Robinhood, а моментално е достапен за трговците на Bitstamp, како и на Robinhood Chain, сопствената блокчејн на компанијата за токенизирани акции и други средства. Пазарната капитализација на RLUSD пораснала на повеќе од 2,5 милијарди долари, додека вкупниот пазар на стабилни криптовалути сега надминува 300 милијарди долари, со доминација на USDT на Tether и USDC на Circle. Robinhood ги објавува резултатите за третиот квартал по затворањето на пазарот во вторник.