Раул Гонзалес си замина од Партизан по оставката на претседателот Жугиќ
Автор: Редакција на FinPortal.mk ·
Шпанскиот ракометен тренер Раул Гонзалес повеќе не е главен тренер на Партизан АдмиралБет, откако клубот вечерва го потврди неговото заминување. Одлуката за раскинување на договорот доаѓа по состанокот на Управниот одбор и оставката на претседателот Миљан Жугиќ, со што српскиот клуб влезе во период на целосен распад на досегашната структура. Според соопштението од клубот, Гонзалес ја презел функцијата ова лето и го предводел тимот во Лигата на шампионите, но со оглед на моменталната ситуација одлучил да го раскине договорот. Претходно беше разрешен и целиот досегашен Управен одбор, а по оставката на Жугиќ беа одржани разговори со стручниот штаб и играчите за преодниот период до формирањето на новото раководство. До крајот на сезоната тимот ќе го води помошниот тренер Марко Павловиќ, на кого ќе му помагаат кондицискиот тренер Марко Исаковиќ, тренерот на голманите Михаило Радосављевиќ и физиотерапевтот Филип Цветиќ. Од клубот му се заблагодарија на шпанскиот стручњак за неговиот придонес и му посакаа среќа и успех во понатамошната тренерска кариера. Покрај тренерот, од Партизан си заминува и играчот Милош Кос, кој веќе си договорил трансфер во Бундеслигата. Овие заминувања доаѓаат во момент кога клубот остана без силната државна финансиска поддршка, што според извештаите предизвика вистински распад-систем во организацијата. Гонзалес е трофеен стручњак кој во минатото работеше и во Вардар, а неговото заминување од Партизан претставува прв официјален чекор во реконструкцијата на клубот по политичките промени во Србија, кои имаат директно влијание и врз спортот во земјата.