Пренџов: Филипче повторно шири паника, како што СДС правеше со писмата на Наумов што не чинеа 30 милиони евра
Автор: Редакција на FinPortal.mk ·
Пратеникот од ВМРО-ДПМНЕ, Љупчо Пренџов, во емисијата „Колегиум“ на Алфа телевизија оцени дека претседателот на една од опозициските партии во земјава повторно шири паника и хистерија кај граѓаните во врска со финансиската состојба на државата. Според Пренџов, станува збор за истата тактика што, како што тврди тој, била применета во 2015 и 2016 година, кога поранешниот функционер на СДС, Кире Наумов, со своите постапки придонел за поскапување на кредитното задолжување на државата. Пренџов направи директна паралела меѓу сегашните изјави на опозицискиот лидер и настаните од периодот на техничката влада. „Ја шири затоа што изминативе години, наместо да биде во затвор, Кире Наумов, беше слободен човек и функционер, затоа ја шири Венко паниката. 2015-2016 година кога имаше техничка влада, кога требаше да се подигне определен кредит, тогаш СДС преку Кире Наумов пишуваше писма до секоја една банка, финансиска институција, меѓународен фонд, во коишто му велеше дека владата ќе крахира, како сега што велат, дека пензии ќе нема, како што сега велат, и дека тие луѓе коишто на Македонија ќе и дадат кредит во тој период, можеби тие пари нема да им бидат вратени“, истакна Пренџов во емисијата. Според пратеникот од ВМРО-ДПМНЕ, тогашната власт сепак успеала да земе кредит, но под многу повисока камата поради писмата што, како што вели тој, ги пишувал Наумов. Пренџов тврди дека разликата во цената на задолжувањето изнесувала 30 милиони евра. „Писмата на Кире Наумов пишувани до меѓународните институции, овој народ го чинат 30 милиони евра. Дојдоа на власт на начин на којшто дојдоа. Тогаш обвинител беше Јовески, наместо да го викне и да видиме зошто тие 30 милиони евра сме ги платиле како народ, а притоа тој кредит е вратен целосно финансиран од државата, тој стана директор на некоја банка во Македонија“, рече Пренџов. Пратеникот додаде и поширока оценка за институционалната одговорност, поврзувајќи ја неказнетоста од минатото со сегашните обиди за поттикнување недоверба кај граѓаните.