Полнење резервоар од 50 литри дизел во Бугарија „јаде“ 15,4 отсто од минималната плата, во Луксембург само 3,8 отсто

Полнењето на резервоар од 50 литри дизел во Бугарија чини еквивалент на 15,4 отсто од бруто минималната месечна плата, додека во Луксембург истиот трошок изнесува само 3,8 отсто. Пред почетокот на војната со Иран, овој удел во Бугарија изнесувал 9,9 отсто, што покажува дека притисокот врз работниците во најниско платените европски земји значително се зголемил, објави Euronews.

Цените на горивата во Европската унија значително пораснаа откако израелско-американскиот заеднички напад врз Иран практично го блокираше Ормускиот проток, клучна рута низ која поминува една петтина од глобалната нафта. Според Неделниот нафтен билтен на ЕУ, просечните малопродажни цени на дизелот во Унијата пораснаа за 40 отсто помеѓу 23 февруари, пред ескалацијата на тензиите на Блискиот Исток, и 21 септември.

На 23 февруари 2026 година, просечната цена за литар во ЕУ изнесувала 1,637 евра за бензинот Еуро 95 и 1,594 евра за дизелот. До 21 септември тие се искачиле на 2,092 евра и 2,226 евра соодветно, што претставува раст од 27,8 отсто за бензинот и 39,6 отсто за дизелот. Споредбата опфаќа 22 земји членки на ЕУ и Турција, кандидат за членство, а користи бруто минимални месечни плати пред одбитоци за даноци и социјално осигурување.

Заклучно со 21 септември, уделот од минималната плата потребен за полнење резервоар од 50 литри бензин се движел од 3,3 отсто во Луксембург до 13,4 отсто во Бугарија.

Под 5 отсто уделот бил во Ирска (4,1 отсто) и Белгија (4,4 отсто). Меѓу големите економии, Германија имала најниска бројка, бидејќи работникот со минимална плата требало да потроши 5 отсто од месечната минимална плата за резервоар од 50 литри бензин. Торстен Милер, виш истражувач во Европскиот институт за синдикати, изјави за Euronews Business дека големите разлики меѓу земјите главно се објаснуваат со разликите во минималните плати. „Еден литар дизел е само маргинално поевтин во Бугарија, додека минималната плата е помалку од една четвртина од онаа во Луксембург“, рече тој.

Кај дизелот, уделот од минималната плата за полнење резервоар од 50 литри се движел од 3,8 отсто во Луксембург до 15,4 отсто во Бугарија. Естер Линч, генерална секретарка на Европската конфедерација на синдикати, предупреди дека кога просечната кирија веќе надминува една третина од минималната плата, трошењето дополнителни 15 отсто од целата плата за гориво е едноставно невозможно. Таа предупреди дека луѓето ќе бидат принудени да се откажат од работата, особено во области без сигурни врски со јавниот транспорт, што би било лошо и за работниците и за компаниите кои веќе се соочуваат со недостиг на работна сила.