По ручекот во Белата куќа: технолошките гиганти остануваат на саморегулација за безбедноста на вештачката интелигенција
По ручекот на американскиот претседател Доналд Трамп со лидерите на најголемите компании за вештачка интелигенција, состојбите во индустријата околу безбедноста на оваа технологија остануваат главно непроменети. Компаниите продолжуваат сами да ги поставуваат правилата за сопственото работење, како што тоа го правеа и претходно, пренесува CNBC.
Трамп во вторникот во Белата куќа ги собра врвните раководители на Alphabet, Meta, SpaceX, Nvidia, Palantir, Anthropic, OpenAI и други компании. Средбата се одржа по три недели интензивна национална дебата за безбедноста на вештачката интелигенција, во која водечките истражувачи и раководители предупредуваа за екстремните закани што ги носат најмоќните модели. И покрај тие предупредувања и барањата на дел од креаторите на политиките за државна регулација, Трамп останува против ваквите мерки и стравувањата од вештачката интелигенција ги нарекува „измама“.
На средбата беше потпишан двопартитен документ со наслов „Белата куќа: Договор за суперинтелигенција — заедничка посветеност на одговорностите на фронтот“, кој Трамп го сподели на својот профил на Truth Social. Во документот се наведува дека секоја компанија е одговорна самата безбедно да ја развива својата технологија и тоа на начин што гради доверба кај клиентите и јавноста. Меѓу потписниците се и дел од истите луѓе кои инсистираа дека без координиран напор за безбедност нивната технологија не може да се смета за доверлива.
Во последниот пасус од документот се вели дека „со текот на времето можеби ќе има смисла овие чекори да се кодифицираат во закони или регулативи“. Прашан од новинарите пред Белата куќа дали правилата се обврзувачки, Трамп рече дека тие се „морално обврзувачки“. Тој, исто така, соопшти дека потпишал документ со кој наводно „официјално“ го менува името на вештачката интелигенција во „суперинтелигенција“, откако претходната недела на социјалните мрежи побара предлози за ново име.
Бредли Таск, извршен директор на Tusk Ventures, во интервју за CNBC оцени дека истите тие извршни директори пред две недели велеа оти треба да бидат регулирани. Според него, причината не е нивната верба во моќта на државата, туку желбата за нешто што ќе создаде рамнотежа меѓу нив.
По ручекот, лидерите брзо ја изразија поддршката за пошироката иницијатива на Трамп. Марк Закерберг од Meta изјави дека договорот треба да им даде на Американците и на клиентите доверба дека технологијата функционира онака како што е замислена, и дека ова е почеток кон кој целата индустрија може да се обедини. Дарио Амодеи од Anthropic рече дека доколку работат правилно и со претседателот, можат безбедно да победат, додека Сундар Пичаи од Alphabet моментот го опиша како историски и значаен.