Платформата „12,05“ бара структурни промени во СДСМ, Мециновиќ ја нарече партијата колосално разочарување

Платформата „12,05“, која се залага за промени во редовите на СДСМ, на денешната проширена расправа заклучи дека на лидерот на партијата Венко Филипче ќе му достави План за консолидација и структурни промени, со цел, како што беше наведено, „за доброто на партијата“. Расправата се одржа во четвртокот со брифинг со новинарите, а денеска продолжи со панел на кој се зборуваше за актуелната состојба во главната опозициска партија.

Главното лице на оваа група, Игор Ивановски, е поранешен потпретседател на СДСМ, пратеник и долго време дел од врвот на партијата, особено во периодот кога со неа раководеше Бранко Црвенковски. Пред почетокот на денешната расправа, тој за новинарите изјави дека знае оти на Венко Филипче му е тешко и дека ќе му биде уште потешко, но, како што нагласи, не смее да му биде потешко на СДСМ. Според него, Филипче има шанса барем на крајот со своите постапки да помогне оваа, во моментов, заробена партија да се отвори и да му се врати на членството. Ивановски додаде дека низ една нормална демократска постапка и процедури, членството на крајот ќе одлучува, но дека е јасно оти во ваква состојба каква што е сега, партијата не може да победи на избори.

По малку неочекувано, на расправата се појави и пратеникот на Левица, Амар Мециновиќ, кој беше кандидат за градоначалник на Скопје. Тој рече дека ја прифатил поканата за да разговара за различни опозициски елементи на општеството. Уште понеочекуван беше неговиот напад на СДСМ пред почетокот на дискусијата, при што изјави дека СДСМ е „едно колосално разочарување за македонските граѓани во изминативе 30 години“, бидејќи, како што рече, се претставувал како антипод на ВМРО-ДПМНЕ. Во некоја рака, тоа беше и прилично провокативно, затоа што негови домаќини на панелот беа луѓе кои подолго време беа во врвот на СДСМ – Андреј Петров како генерален секретар и член на Извршниот одбор, Гордан Георгиев како потпретседател, поранешниот генерален секретар Никола Ќуркчиев, поранешниот портпарол Емилијан Станковиќ, како и Славјанка Петровска како актуелна пратеничка.

Мециновиќ му забележа на СДСМ што не застанал отворено зад него на вториот круг од изборите за градоначалник на Скопје. На панелот „Разговори за иднината“ имаше претставници и на други структури од општеството, како на пример адвокатот Звонко Давидовиќ и професорот Ненад Марковиќ.

Во соопштението што подоцна попладнево го испрати Платформата се наведува дека во дискусијата, меѓу другото, се заклучило оти актуелната влада на ВМРО-ДПМНЕ е на врвот на ранг листата на неспособни влади, како и дека нивна прва задача е да го променат изборниот модел, и тоа во прва фаза да се воведе една изборна единица, а во втора фаза отворени листи.

Од она што беше соопштено, произлегува дека Платформата „12,05“ инсистира на внатрешна демократизација и враќање на довербата на членството, како предуслов за понатамошен успех на партијата на избори. Планот за консолидација и структурни промени, кој треба да му биде доставен на Филипче, претставува конкретен чекор во таа насока, а неговото прифаќање или отфрлање ќе биде показател за подготвеноста на сегашното раководство да отвори простор за внатрешна дебата.

Иако настанот беше замислен како внатрешна расправа за иднината на СДСМ, присуството на претставник на Левица и неговиот остар тон кон партијата домаќин дополнително ја истакнаа длабочината на незадоволството од актуелната состојба во опозицијата. Со оглед на тоа што меѓу присутните имаше и поранешни високи функционери на СДСМ, пораката дека партијата мора да се менува одвнатре доби дополнителна тежина, бидејќи доаѓа од луѓе кои добро ја познаваат нејзината внатрешна структура и работење.

Од Платформата „12,05“ не прецизираа кога точно планот ќе му биде предаден на лидерот на СДСМ, ниту какви конкретни мерки содржи, но јасно ставија до знаење дека очекуваат процесот на промени да се одвива по демократска процедура, во која конечната реч ќе ја има членството. Дали тоа ќе се случи и во кој рок, останува да се види во наредниот период, кога ќе бидат познати и реакциите на раководството на партијата.