Осборн: Брегзит ја турна Британија „од карпа“, враќање во царинската унија е најбрз излез

Поранешниот британски канцелар Џорџ Осборн оцени дека британската економија „паднала од карпа“ по Брегзит и дека враќањето во царинската унија на Европската Унија би било најбрзиот пат кон закрепнување. Во интервју за „Индипендент“, Осборн не штедеше критики за последиците од излезот од ЕУ, велејќи дека Брегзит „беше хаос“.

„Британија во основа падна од карпа. Тоа имаше огромно влијание врз британската економија. Земјата е јасно посиромашна отколку што би била во спротивно“, изјави Осборн, кој беше дел од кабинетот на Дејвид Камерон во времето на референдумот и поднесе оставка од функцијата канцелар потоа.

Осборн признава дека враќањето во ЕУ е тешко една деценија по референдумот, но смета дека потесните врски со Европа можат да ја зајакнат економијата.

Тој потсетува дека царинската унија никогаш не била дел од дебатата за Брегзит и дека „никој не знаеше дека ја напуштаме“, што, според него, имало разорно влијание врз трговијата. За разлика од враќањето во единствениот пазар, приклучувањето кон царинската унија не бара прифаќање на слободното движење на луѓето — прашање кое, како што вели, во моментов е тешко продадливо на британската јавност.

Осборн додава дека, доколку тој беше на местото на Енди Барнам, не гледа причина зошто не би се вратил во царинската унија, оценувајќи ја одлуката како „прилично јасна“.