ОКТА со добивка од 2,3 милијарди денари по девет месеци, приходите двојно поголеми

Најголемиот увозник на горива во земјата, ОКТА, во првите девет месеци од 2026 година оствари добивка пред оданочување од 2,3 милијарди денари, што е околу 37,5 милиони евра. Приходите од продажба достигнаа 57,6 милијарди денари, што претставува зголемување од 105 проценти во споредба со истиот период минатата година, покажуваат финансиските резултати на компанијата доставени до Македонската берза.

Од компанијата тврдат дека значаен дел од овој раст е резултат на позитивните ефекти од вреднувањето на залихите на нафтени деривати. Како што е наведено во извештајот за трите квартали од 2026 година, силната побарувачка на пазарот и зголемената логистичка флексибилност значително го зголемиле вкупниот обем на продажба во текот на деветмесечниот период. Користењето на продуктоводот Солун–Скопје дополнително ги зајакнало капацитетите на ОКТА за снабдување на регионалниот пазар, кој продолжува да се соочува со построги услови за снабдување.

„Силната побарувачка на пазарот и зголемената логистичка флексибилност значително го зголемија вкупниот обем на продажба во текот на деветмесечниот период од 2026 година. Користењето на продуктоводот Солун–Скопје дополнително ги зајакна капацитетите на ОКТА за снабдување на регионалниот пазар, кој продолжува да се соочува со построги услови за снабдување. Приходите од продажба достигнаа 57.622 милиони денари, што претставува раст од 105 отсто на годишно ниво, првенствено поттикнат од поголемиот обем на продажба на домашниот и извозниот пазар, како и од зголемените цени на горивата“, коментира компанијата.

Прилагодената ЕБИТДА, во која не е вклучен ефектот од вреднувањето на залихите, изнесува 1,127 милијарди денари, што е двојно повеќе од 564 милиони денари во истиот период лани. Според компанијата, овој показател упатува на значително подобрување на основните оперативни перформанси, независно од промените на пазарните цени на горивата.

Зголемените приходи се резултат на поголемиот обем на продажба на домашниот и странските пазари, но и на повисоките цени на горивата. Дополнителен фактор е и повторното ставање во функција на продуктоводот Солун–Скопје, преку кој компанијата доби поефикасен начин за снабдување со нафтени деривати од Грција. Станува збор за цевковод долг 213,5 километри, кој има капацитети за складирање од 80.000 кубни метри во Грција и 30.000 кубни метри во Македонија. Неговото активирање овозможува директен транспорт на дизел од солунската рафинерија до ОКТА.

Финансиските резултати на ОКТА доаѓаат во период кога регионалниот пазар на нафтени деривати се соочува со построги услови за снабдување, а компанијата преку комбинацијата од зголемен обем на продажба, повисоки цени и повторно активиран транспортен капацитет успеа да ги удвои приходите и да оствари солидна добивка пред оданочување.