ОЕЦД: Светската економија поиздржлива на војната со Иран, но изгледите кревки

Светската економија ги поднесе притисоците од војната со Иран подобро од првичните стравувања, но нејзините изгледи остануваат „во голема мера зависни“ од трајното решавање на конфликтот, предупреди Организацијата за економска соработка и развој (ОЕЦД) со седиште во Париз.

Во својот привремен економски преглед, ОЕЦД оцени дека глобалниот раст бил поиздржлив од очекуваното кога војната на САД и Израел против Иран започна кон крајот на февруари.

Сепак, ОЕЦД предупреди дека неодамнешното повторно зголемување на цените на нафтата и гасот носи ризици за претстојните месеци. „Глобалните економски изгледи остануваат во голема мера зависни од тоа дали ќе се постигне трајно решение за конфликтот на Блискиот Исток“, се наведува во соопштението.

Во кварталното ажурирање на прогнозите, ОЕЦД очекува глобалниот економски раст годинава да изнесува 2,9 отсто – скромно зголемување од 0,1 процентен поен во однос на прогнозата од 2,8 отсто од јуни. Истовремено, прогнозата за следната година е малку намалена, од 3,1 отсто на 3 отсто. Цените на нафтата во вторникот паднаа под 100 долари за барел поради надежите за потенцијален договор меѓу САД и Иран, но продолжениот застој меѓу двете страни ги разгоре енергетските трошоци во последните недели. ОЕЦД предупреди дека, иако со намалување на непријателствата се очекува поголемо снабдување со нафта, „обновени или постојани прекини би можеле да доведат и до повисока инфлација и до послаб раст“.

Како „значителен ризик за намалување“ за светската економија, организацијата го идентификуваше и рекордниот временски систем Ел Нињо, за кој се очекува да биде најсилниот во 1.000 години, предупредувајќи дека може да ја погоди земјоделската производство и да ги зголеми цените на храната. Меѓу другите ризици се и дополнителното зголемување на приносите, односно каматните стапки на државните обврзници, кои пораснаа поради стравувањата од повисока инфлација, како и губењето на довербата на пазарот во вредноста на компаниите за вештачка интелигенција.

ОЕЦД наведе дека инвестициите во вештачка интелигенција помогнаа да се неутрализира пошироката економска слабост, особено во американската економија. „Во САД дејствуваат спротивставени сили, со силна основна динамика и дополнително ширење на инвестициите во вештачка интелигенција, но и потрошувачка која е сè повеќе ограничена од намалената куповна моќ, послабиот раст на работната сила и исцрпените заштеди на домаќинствата“, се вели во прегледот.

За Обединетото Кралство, ОЕЦД значително ја намали прогнозата за инфлацијата годинава, од 3,7 отсто на 3,1 отсто, откако цените пораснаа помалку драматично од очекуваното. Економскиот раст за Обединетото Кралство се прогнозира на 1,1 отсто за 2026 година, што е повеќе од 0,9 отсто колку што беше прогнозирано во јуни и 0,7 отсто во март, „со очекување потрошувачката да биде поддржана од новообјавените владини мерки за поддршка“. Растот сепак се очекува да биде послаб од 1,4 отсто колку што беше забележан лани и се прогнозира благо намалување следната година, на 1 отсто.