Нвидија отвори независна истрага за наводната врска на Џенсен Хуанг со осомничена кинеска шпионка

Американскиот технолошки гигант Нвидија отвори независна истрага по извештаите дека неговиот извршен директор Џенсен Хуанг имал врска со осомничена кинеска шпионка. Компанијата, една од највредните во светот, соопшти дека одборот нема причина да верува оти се загрозени тајните на компанијата или националната безбедност, и додаде дека извршниот директор е посветен на продолжување на раководењето со компанијата.

Одделно, Џенсен Хуанг призна дека бил „неверен“ на својата сопруга и се извини за болката што им ја нанел неа и на нивните деца. Според извештај на Њујорк тајмс, американските разузнавачки служби веруваат дека кинеската бизнисменка Алис Хуанг, која имала блиска врска со Џенсен Хуанг, била шпионка за Пекинг. Џенсен Хуанг изјави дека ја презема „целосната одговорност“ за она што го направил и додаде дека не ги исполнил своите обврски кон вработените, одборот и акционерите на Нвидија.

Одборот на директори на Нвидија издаде одделно соопштение во кое наведе дека ќе поведе истрага „во светлина на неодамнешните извештаи дека основачот и извршен директор Џенсен Хуанг бил цел на странска разузнавачка операција“. Одборот, како што се наведува, ги става американската национална и економска безбедност во приоритет, што е од најголемо значење за интересите на Нвидија и нејзините акционери. „Иако одборот нема причина да верува дека биле загрозени националната безбедност или тајните на Нвидија, истрагата на одборот ќе ги испита сите достапни информации“, се додава во соопштението.

Алис Хуанг, која не е во роднинска врска со Џенсен Хуанг, е поврзана со сингапурската компанија за податочни центри Мегаспид. Компанијата минатиот месец за Њујорк тајмс изјави дека сегашното раководство сериозно ги сфаќа обвинувањата и ангажирало надворешни правни советници за спроведување внатрешна истрага. Според извештајот, американските разузнавачки агенции ја следеле Алис Хуанг и заклучиле дека таа дејствувала во име на кинеската влада. Надзорот наводно открил комуникации меѓу Алис Хуанг и американски државјанин, кој подоцна бил идентификуван како Џенсен Хуанг преку процес познат како „откривање“. Останува нејасно какви информации наводно пренела Алис Хуанг на Пекинг, колку биле вредни или кога почнала да собира разузнавачки податоци. Кина претходно ги отфрли обвинувањата за шпионска операција насочена кон шефот на Нвидија, опишувајќи ги како „неосновани шпекулации“.

Минатата недела членови на Конгресот му напишаа на Џенсен Хуанг со барање да се појави пред нив поради наводната врска. Тројца републикански претседатели на комитети во Претставничкиот дом побараа од извршниот директор да се појави подоцна во месецот за да зборува за „безбедносните протоколи на Нвидија против шпионажа на странски противници“. Нвидија е централен играч во инфраструктурата за вештачка интелигенција и снабдува чипови за водечките развивачи на модели, меѓу кои OpenAI и Мета. Производителот на микрочипови вреди околу 4,5 трилиони долари, што го прави една од највредните компании досега.